وزیراعلی یوگی کے خلاف تبصرہ کرنے والے صحافی پرشانت کی بیوی پہنچی سپریم کورٹ

نئی دہلی: اترپردیش کے وزیراعلی یوگی آدتیہ ناتھ کے خلاف مبینہ طور پر قابل اعتراض تبصروں کے سلسلے میں گرفتار کیے گئے پرشانت قنوجیا کی بیوی جگیشا اروڑا نے اپنے شوہر کی رہائی کے لئے سپریم کورٹ میں اپیل دائرکی ہے، جس پر کل سماعت ہوگی۔

عرضی گزار کی جانب سے وکیل نتیا رام کرشن نے جسٹس اندرا بنرجی اور جسٹس اجے رستوگی کی تعطیلی بنچ کے سامنے معاملے کا خصوصی ذکر کیا ہے اور عدالت سے فوری طور پر سماعت کی اپیل کی ہے۔ عدالت عرضی پر سماعت کو تیار ہوگئی اور اس کے لئے کل کی تاریخ مقرر کی ہے۔

یوگی آدتیہ ناتھ کے ساتھ اپنے تعلقات ہونے کا دعوی کرنے والی ایک خاتون کے بارے میں شائع خبر کو مزاحیہ تبصرے کے ساتھ ٹیوئٹر پر جمعرات کو شیئر کرنے کے الزام میں پرشانت قنوجیا کو اترپردیش پولس نے ہفتے کے روز دہلی کے مغربی ونود نگر میں واقع ان کے گھر سے گرفتار کرلیا تھا۔

اترپردیش پولس نے معاملے کا از خود نوٹس لیتے ہوئے لکھنؤ کے حضرت گنج پولس اسٹیشن میں ایک ایف آئی آر درج کی ہے، جس میں کہا گیا ہے کہ پرشانت قنوجیا نے ٹوئٹر کے ذریعہ قابل اعتراض پوسٹ کر کے وزیراعلی یوگی آدتیہ ناتھ کی شبیہ خراب کرنے کی کوشش کی ہے۔

عرضی گزار جگیشا اروڑا نے اپنے شوہر کی گرفتاری کو غیر قانونی اور یک طرفہ قرار دیتے ہوئے ان کی رہائی کا مطالبہ کیا ہے۔