کیا ترنمول کی رکن پارلیمنٹ نصرت جہاں جلد نصرت جین ہو جائیں گی؟

ترنمول کانگریس کے ٹکٹ پر بشیرہاٹ سے لوک سبھا کے لئے منتخب ہونے والی بنگال کی خوبصورت اداکارہ نصرت جہاں نے دہلی میں پارلیمنٹ ہاؤس کا دورہ کیا وہیں دو دن پہلے اجمیر میں خواجہ غریب نواز کے آستانے پر حاضری بھی دی، جہاں انہوں نے عقیدت کی چادر چڑھائی اور اپنے لئے دعا مانگی۔ 28 سالہ نصرت جہاں نے حال ہی میں اختمام پزیر ہوئے لوک سبھا انتخابات میں اپنے حریف سینتن باسو کو ساڑھے تین لاکھ سے زیادہ ووٹوں سے شکست دی ہے۔

جیت کے بعد وہ جب دہلی آئیں اور اپنی نو منتخب ساتھی میمی چیٹرجی کے ساتھ مغربی لباس میں پارلیمنٹ پاؤس پہنچی تو بہت سے لوگوں نے ان کے ٹوئٹر اکاؤنٹ پر جملہ کشی کی۔ اب جب انہوں نےخواجہ غریب نواز کے اپنے دورے کی خبر سوشل میڈیا پر شئیر کی تو بھی اس پر کافی رد عمل سامنے آئے۔ اگر افواہوں اور خبروں پر یقین کیا جائے تو نصرت جہاں اگلے ماہ جون میں کولکاتا کے تاجر نکھل جین کے ساتھ شادی کے بندھن میں بندھنے جا رہی ہیں۔

واضح رہے نصرت جہاں نے ترنمول کانگریس سے 22 اپریل کو بشیر ہاٹ پارلیمانی حلقہ سے اپنے کاغذات نامزدگی داخل کیے تھے اور ان کے انتخابی میدان میں اترنے کے بعد ترنمول کانگریس کو کافی فائدہ ہوا تھا۔ نصرت کو بشیرہاٹ کے موجودہ رکن پارلیمنٹ محمد ادریس کی جگہ ٹکٹ ملا تھا۔ اس سال ہوئے عام انتخابات میں ترنمول کانگریس نے سب زیادہ خواتین کو اپنی پارٹی کا امیدوار بنایا تھا۔