گمنام پارٹیوں کو 4300 کروڑ کا چندہ کہاں سے ملا؟ کیا ان سے حلف نامہ مانگا گیا؟ راہل کا الیکشن کمیشن سے تلخ سوال

 کانگریس رہنما راہل گاندھی نے اس وقت ووٹر لسٹ میں گڑبڑی معاملے پر الیکشن کمیشن کے خلاف زبردست مہم چلا رکھی ہے۔ بہار میں ووٹر ادھیکار یاترا میں وہ لوگوں کو ’ووٹ چوری‘ سے باخبر کرا رہے ہیں۔ اس درمیان انہوں نے الیکشن کمیشن کو ایک اور معاملے میں کٹہرے میں کھڑا کر دیا ہے۔ راہل نے سوال کیا ہے کہ گجرات میں گمنام پارٹیوں نے ہزاروں کروڑ روپے کا چندہ جمع کیا ہے تو کیا ان سے حلف نامہ مانگا گیا؟ حال ہی میں الیکشن کمیشن نے ووٹر لسٹ میں گڑبڑی کا الزام لگانے پر راہل گاندھی سے حلف نامہ داخل کرنے کے لیے کہا تھا۔

دراصل ’دینک بھاسکر‘ کی ایک رپورٹ میں انکشاف ہوا ہے کہ گجرات کی 10 گمنام پارٹیوں کو 5 سال میں 4300 کروڑ روپے کا چندہ ملا ہے، اسی خبر کے حوالے سے راہل نے الیکشن کمیشن پر طنز کسا ہے۔

راہل گاندھی نے اپنے سوشل میڈیا سائٹ ’ایکس‘ پر ’دینک بھاسکر‘ کی خبر کو شیئر کرتے ہوئے لکھا- ’’گجرات میں کچھ ایسی گمنام پارٹیاں ہیں جن کا نام کسی نے نہیں سنا، لیکن 4300 کروڑ کا چندہ ملا ہے۔ ان پارٹیوں نے بہت ہی کم موقعوں پر انتخاب لڑا ہے، یا ان پر خرچ کیا ہے۔‘‘

راہل نے آگے کہا کہ یہ ہزاروں کروڑ آئے کہاں سے؟ چلا کون رہا ہے انہیں؟ اور پیسہ گیا کہاں؟ کیا الیکشن کمیشن جانچ کرے گا یا پھر یہاں بھی پہلے حلف نامہ مانگے گا؟ یا پھر قانون ہی تبدیل کر دے گا، تاکہ یہ ڈاٹا بھی چھپایا جا سکے؟

راہل گاندھی الیکشن کمیشن کی کارکردگی سے کافی ناراض ہیں۔ انہوں نے کئی معاملوں میں کمیشن کی غلطیوں کو سبھی کے سامنے ظاہر کیا ہے۔ ان کا الزام ہے کہ ملک میں الیکشن کمیشن اس وقت کسی خاص پارٹی کے لیے کام کر رہا ہے۔ گجرات کے چندہ معاملے میں بھی راہل نے الیکشن کمیشن کے پالے میں گیند ڈالتے ہوئے سوال کیا ہے کہ کیا اب الیکشن کمیشن اس معاملے پر کوئی کارروائی کرے گا؟

میڈیا رپورٹس کے مطابق گجرات میں 10 سیاسی پارٹیوں کو 23 لوگوں نے چندہ دیا ہے۔ چندہ لینے والی سیاسی پارٹیوں نے لوک سبھا اور اسمبلی انتخاب دونوں میں اپنے اپنے امیدوار اتار تھے۔ انہیں پورے انتخابات میں کُل ملا کر 54,069 ووٹ ملے ہیں۔