دہلی-این سی آر میں موسم میں تبدیلی، کئی ریاستوں میں بارش کے سبب دو دن تک سرد لہر کی پیش گوئی

نئی دہلی: دہلی-این سی آر میں موسم کا انداز ایک بار پھر بدل گیا ہے۔ بدھ کو صبح کے وقت ہلکی بارش کی وجہ سے درجہ حرارت میں کمی واقع ہوئی۔ وہیں باہری دہلی کے کچھ علاقوں میں اولے پڑنے کی بھی اطلاع موصول ہوئی ہے۔ محکمہ موسمیات کے مطابق آج بدھ یعنی 9 فروری کو گرج چمک کے ساتھ دہلی این سی آر میں بارش کا سلسلہ جاری رہے گا۔ محکمہ موسمیات کے مطابق دہلی میں آج کم سے کم درجہ حرارت 13 ڈگری سیلسیس، جبکہ زیادہ سے زیادہ درجہ حرارت 22 ڈگری سیلسیس رہنے کا امکان ہے۔

محکمہ موسمیات نے 9 فروری یعنی آج کے لئے پنجاب، ہریانہ، دہلی، اتر پردیش اور شمالی راجستھان میں گرج چمک کے ساتھ بارش کا امکان ظاہر کیا ہے۔ جبکہ جموں، کشمیر، لداخ، مظفرآباد، ہماچل پردیش اور اتراکھنڈ کے مغربی ہمالیائی علاقے میں رات کے وقت ہلکی بارش کے ساتھ برف باری ہو سکتی ہے۔

اگلے 2 دنوں کے دوران مغربی بنگال، پنجاب، ہریانہ، دہلی، اتر پردیش، شمالی راجستھان، آسام، میگھالیہ، ناگالینڈ، منی پور، میزورم اور تریپورہ کے کچھ حصوں میں رات اور صبح کے وقت گہری دھند چھائی رہنے کا امکان ہے۔ 9 اور 10 فروری کو مغربی بنگال، سکم اور جھارکھنڈ میں بارش کا امکان ہے۔ جبکہ بہار اور اڈیشہ کے مختلف اضلاع میں بارش کی وجہ سے درجہ حرارت میں کمی واقع ہو سکتی ہے۔