خبردار! ’کورونا کی نئی شکل جون یا پھر جولائی میں آنے کا امکان‘

حیدرآباد: شہرحیدرآباد کے گاندھی اسپتال کے سپرنٹنڈنٹ ڈاکٹر راجا راؤ نے کہا کہ آنے والے دنوں میں کورونا کی مزید نئی شکلیں آئیں گی۔ انہوں نے کہا کہ اس وائرس کے آغاز کے بعد سے اس کے تجزیہ سے یہ پتہ چلتا ہے کہ ایک شکل سے دوسری شکل کے پیدا ہونے میں 6 ماہ کا وقت لگتا ہے۔

ڈاکٹر راجا راؤ نے امکان ظاہر کیا کہ کورونا کی نئی شکل جون یا پھر جولائی میں آئے گی۔ انہوں نے عوام کو انتباہ دیتے ہوئے کہا کہ وائرس میں کمی پر لاپرواہی کا مظاہرہ نہ کریں۔ یہ وائرس مکمل طور پر ختم نہیں ہوا ہے۔ کورونا کی نئی شکل سامنے آئے گی تاہم اس کی شدت کے بارے میں ہنوز کچھ نہیں کہا جا سکتا۔

ڈاکٹر راجا راؤ نے کہا کہ کسی بھی وائرس کا بدلنا عام بات ہے۔ عوام کو چاہیے کہ وہ کورونا کے قوانین پر زیادہ سے زیادہ عمل کریں۔ عوامی مقامات پر جاتے وقت ماسک لگانا نہ بھولیں۔ ہاتھوں کے لیے سینیٹائزر، جسمانی فاصلہ لازمی ہے ۔انہوں نے واضح کیا کہ آنے والے کچھ وقت تک سبھی کو کورونا قوانین پر عمل کرنا ہوگا۔