ورچوئل میٹنگ: پی ایم مودی نے ایودھیا میں ترقیاتی کام کا لیا جائزہ، ’زمین گھوٹالہ‘ پر نہیں ہوئی کوئی بات

پی ایم مودی نے کہاکہ ایودھیا ثقافتی طورپر ہر ہندوستانی کے دل میں بسا ہے، اس لئے اس کی ترقی کا کام صحت مند عوامی شراکت داری سے اس طرح کیا جانا چاہیے کہ اس کی ثقافتی اہمیت کو زیادہ سے زیادہ بڑھایا جاسکے

تصویر یو این آئی
تصویر یو این آئی
user

قومی آوازبیورو

ایودھیا میں رام مندر تعمیر کو لے کر جاری سرگرمیوں کے درمیان آج وزیر اعظم نریندر مودی نے ورچوئل میٹنگ کر ایودھیا میں ہوئے ترقیاتی کاموں کا جائزہ لیا۔ اس دوران ایودھیا میں زمین خریداری کو لے کر ہوئے مبینہ گھوٹالے پر کوئی بات چیت نہیں ہوئی۔ اپوزیشن لیڈران نے یہ مطالبہ کیا تھا کہ پی ایم مودی کروڑوں روپے کے زمین گھوٹالہ معاملہ میں سخت رخ اختیار کریں، اور سادھو-سَنتوں کے ایک طبقہ نے بھی وزیر اعظم سے قصورواروں کے خلاف کارروائی کرنے کی بات کہی تھی، اور امید کی جا رہی تھی کہ ورچوئل میٹنگ میں اس تعلق سے گفت و شنید ہوگی لیکن ایسا کچھ نہیں ہوا۔ میٹنگ میں صرف ایودھیا کے ترقیاتی کاموں اور منصوبوں کے بارے میں بات ہوئی۔

میٹنگ کے دوران وزیراعظم نریندر مودی نے کہا کہ ایودھیا شہر ثقافتی طور پر ہر ہندوستانی کے دل میں بسا ہے اور اس لئے اس کی ترقی کا کام صحت مند عوامی شراکت داری سے اس طرح کیا جانا چاہیے کہ اس کی ثقافتی اہمیت کو زیادہ سے زیادہ بڑھایا جاسکے۔ پی ایم مودی نے سنیچر کو یہاں ایودھیا کی ترقی کے منصوبہ کا ویڈیو کانفرنس سے جائزہ لیا۔ اترپردیش کے حکام نے اس موقع پر ایودھیا کی ترقی سے منسلک منصوبوں پر ایک پریزنٹیشن پیش کیا۔ ایودھیا کا ڈیولپمنٹ ایک روحانی مرکز، عالمی سیاحت کا مرکز اور ایک پائیدار اسمارٹ سٹی کے طور پر کیا جا رہا ہے۔


وزیراعظم نے کہا کہ بھگوان رام میں لوگوں کو ایک ساتھ لانے کی صلاحیت تھی اسے مدنظر رکھ کر ایودھیا کی ترقی کا کام صحت مند شراکت داری پر مبنی ہونا چاہیے اور نوجوانوں کو اس میں خاص طورپر حصہ لینا چاہیے۔ اترپردیش کے وزیراعلی یوگی آدتیہ ناتھ اور کئی دیگر اہم حکام بھی اس موقع پر موجود تھے۔ وزیراعظم کو ایوھیا کے ساتھ کنیکٹویٹی بڑھانے کے لئے متعدد مجوزہ اور آئندہ بنیادی ڈھانچہ کے منصوبوں کے بارے میں بتایا گیا جس میں ہوائی اڈہ، ریلوے اسٹیشن، بس اسٹینڈ، سڑکیں اور شاہراہوں کی توسیع شامل ہے۔

اس دوران ایک سبز قصبے کے بارے میں بھی بات چیت کی گئی جس میں شردھالووں کے لئے آشرم، مٹھ، ہوٹل اور مختلف ریاستوں کی عمارتیں شامل ہوں گی۔ ایک عالمی سطحی استقبالیہ مرکز اور میوزیم بھی بنایا جائے گا۔ سرجو ندی او ر اس کے گھاٹوں کے آس پاس ڈھانچہ جاتی ترقی پر خصوصی توجہ دی جارہی ہے۔ ندی میں کروز چلانے کے بارے میں بھی بات چیت کی گئی۔ شہر میں پیدل چلنے والوں اور سائیکل والوں کے لئے بھی خصوصی انتظام کیا جائے گا۔ ٹریفک کا انتظام بھی اسمارٹ سٹی کے ماڈل کی بنیاد پر کیا جائے گا۔


وزیراعظم نے کہا کہ ایودھیا ایسا شہر ہے جو ثقافتی طورپر ہر ہندوستانی کے دل میں بسا ہے۔ ایودھیا میں ہماری بہترین روایتوں اور ترقی کی جھلک ہونی چاہیے۔ اس شہر کی ڈھانچہ جاتی ترقی کے ساتھ میل ہونا چاہیے جو سب کے لئے اچھا ہوگا۔ پی ایم مودی نے کہا کہ آئندہ نسلوں کو زندگی میں ایک بار ایودھیا آنے کا احساس اور خواہش ضرور ہونا چاہیے۔ انہوں نے کہا کہ شہر میں ترقیاتی کام مسلسل جاری رہیں گے۔ ساتھ ہی ہمیں ایودھیا کوترقی کے نئے آیام کی طرف گامزن کرنے کام بھی ساتھ ہی شروع کردینا چاہیے۔ ہم سب کو متحد ہوکر ایودھیا کی شناخت کو منانا چاہیے اور اس کی ترقی رفتار کو نئے نئے طریقوں سے قائم رکھنا چاہیے۔

(یو این آئی اِن پٹ کے ساتھ)

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔