وارانسی میں دردناک حادثہ، زیر تعمیر پل منہدم، 22 ہلاک

وارانسی میں منہدم ہوا زیر تعمیر پل

پل کا ایک حصہ گرنے کے سبب کئی گاڑیاں اس کی زد میں آ گئیں۔ اطلاعات کے مطابق پل کے نیچے کم و بیش 50 لوگوں کے دبے ہونے کا اندیشہ ہے۔

وزیر اعظم نریندر مودی کے پارلیمانی حلقہ وارانسی میں اس وقت دردناک حادثہ پیش آیا جب ایک زیر تعمیر پل کا حصہ ٹوٹ کر گر گیا۔ ذرائع کے مطابق اس پل کے منہدم ہونے کے سبب 22 لوگ ہلاک ہو گئے ہیں۔ ایک ذرائع کا یہ بھی کہنا ہے کہ اس میں کم از کم 50 لوگوں کے دَبے ہونے کا اندیشہ ہے۔ جو لوگ منہدم پل کے نیچے دَبے ہیں وہ پل کے کنارے سے جا رہے تھے۔

یہ حادثہ منگل کی شام کینٹ ریلوے اسٹیشن کے پاس زیر تعمیر پل کے ساتھ ہوا ہے۔ اس کی زد میں کئی گاڑیاں بھی آئی ہیں۔ حادثہ کے بعد موقع پر چیخ و پکار اور افرا تفری کا ماحول دیکھنے کو ملا۔ واقعہ کے وقت جائے وقوع پر موجود لوگوں نے زخمیوں کو بچانا شروع کیا۔ حیرت کی بات یہ ہے کہ حادثہ رونما ہونے کے 15 منٹ بعد تک پولس اور ایمبولنس وہاں نہیں پہنچی۔ بہر حال، اب بچاؤ کام تیزی کے ساتھ چل رہے ہیں۔ کئی اعلیٰ افسران بھی موقع پر پہنچ چکے ہیں اور حالات کا جائزہ لے رہے ہیں۔

سب سے زیادہ مقبول