وارانسی: گنگا کے پانی کی سطح میں ہر گھنٹہ 4 سینٹی میٹر کی رفتار سے ہو رہا ہے اضافہ، ’صبح بنارس‘ کا اسٹیج بھی غرقاب

گنگا کے پانی کی سطح میں اضافہ مسلسل جاری ہے۔ 15 جولائی کو اسّی گھاٹ پر ’صبحِ بنارس‘ کا زیادہ تر حصہ اور ’شیتل ماتا کی مورتی اور مندر‘ مکمل طور سے پانی میں ڈوب گیا۔ دشاسوامیدھ گھاٹ پر واٹر پولیس چوکی تک پانی پہنچ چکا ہے۔ گنگا کے پانی کی سطح کو دیکھتے ہوئے واٹر پولیس نے موٹر بوٹ پر آرتی دیکھنے پر مکمل طور سے پابندی عائد کر دی ہے۔ دوسری جانب نمو گھاٹ پر ’نمستے اسکلپچر‘ کا نچلا حصہ بھی ڈوب گیا ہے۔ اسّی گھاٹ سے لے کر راج گھاٹ تک کے تمام مندر پانی میں ڈوب چکے ہیں۔ کئی مندروں کے تو صرف اوپری حصے ہی نظر آ رہے ہیں۔ واٹر پولیس انچارج راج کشور پانڈے نے بتایا کہ دشاسوامیدھ گھاٹ پر ہونے والی گنگا آرتی اب علامتی طور پر کی جائے گی۔ گھاٹوں پر سیکورٹی کے مد نظر این ڈی آر ایف اور پی اے سی تعینات کی گئی ہے۔

منگل کو سنٹرل واٹر کمیشن کی جانب سے جاری سیلاب کے بلیٹن کے مطابق صبح 8 بجے گنگا کے پانی کی سطح 68.42 میٹر ریکارڈ کی گئی۔ پانی کی سطح میں 4 سینٹی میٹر کی رفتار سے اضافہ ہو رہا تھا، جبکہ دوپہر کے بعد 2 سینٹی میٹر فی گھنٹہ کی رفتار سے پانی کی سطح میں اضافہ ہوا۔ شام 7 بجے گنگا کے پانی کی سطح 68.70 میٹر ریکارڈ کی گئی جو خطرے کی نشان 70.26 میٹر سے 1.56 میٹر نیچے ہے۔

گنگا کی معاون ندی ورونا کا الٹا بہاؤ اور ورونا کوریڈور میں پانی کی سطح میں اضافے کی وجہ سے شہر کے درمیان بسی آبادی (ساحلی علاقوں) میں سیلاب کا بحران گہرا ہوتا جا رہا ہے۔ منگل کو ہدایت نگر اور آس پاس کے محلوں میں سیلاب کا پانی تیزی سے داخل ہو گیا، جس کی وجہ سے کئی گھر پانی میں ڈوب گئے۔ دوسری جانب رمنا علاقہ میں شمشان کے آگے تک پانی چڑھ گیا ہے۔ 5 فٹ کے قریب پانی بڑھنے کے بعد رمنا ٹکری میں سیکڑوں بیگھا میں کھڑی فصلوں کے پانی میں ڈوب جانے کا خدشہ ہے۔