اتر پردیش: بہرائچ میں مدرسہ اور مکانوں پر چلایا گیا بلڈوزر

بہرائچ کے فخر پور تھانہ حلقہ کے عزیز پور ٹیپرا میں قبرستان و کھلیان کی زمینوں پر غیر قانونی قبضہ کر بنائے گئے نصف درجن سے زیادہ مکانوں و ایک مدرسے کو انتظامیہ نے بلڈوزر سے منہدم کرا دیا۔

بلڈوزر، تصویر آئی اے این ایس
بلڈوزر، تصویر آئی اے این ایس
user

قومی آوازبیورو

اتر پردیش میں اسمبلی انتخاب کا نتیجہ برآمد ہونے کے بعد ’بلڈوزر‘ لفظ کافی سرخیوں میں ہے۔ بی جے پی لیڈران اپنے بیانات میں اس لفظ کا خوب استعمال کر رہے ہیں۔ اس درمیان زمینوں پر ہوئے غیر قانونی قبضہ کو ہٹائے جانے کے نام پر کچھ عمارتوں کو بلڈوزر سے منہدم بھی کیے گئے ہیں۔ ایسا ہی ایک معاملہ بہرائچ میں دیکھنے کو ملا ہے۔ یہاں کھلیان و قبرستان کی زمین پر سے غیر قانونی قبضہ ہٹانے کے لیے مکان و مدرسہ کو منہدم کر دیا گیا۔ جس وقت مکان و مدرسہ کو منہدم کیا گیا تحصلیدار و مقامی تھانہ انچارج پولیس فورس کے ساتھ وہاں موجود تھے۔ مکان گرانے سے پہلے تھانہ انچارج نے باقاعدہ لاؤڈاسپیکر سے انہدامی کارروائی کے متعلق اعلان کیا تھا۔

میڈیا رپورٹ کے مطابق 22 مارچ کو بہرائچ کے فخر پور تھانہ حلقہ کے عزیز پور ٹیپرا میں قبرستان و کھلیان کی زمینوں پر غیر قانونی قبضہ کر بنائے گئے نصف درجن سے زیادہ مکانوں و ایک مدرسے کو انتظامیہ نے بلڈوزر سے منہدم کرا دیا۔ اس پوری کارروائی کو انجام دینے کے لیے قیصر گنج تحصلیدار شیوپرساد و فخر پور کے انچارج انسپکٹر پرمانند تیواری پولیس فورس کے ساتھ پہنچے۔ تھانہ انچارج پرمانند تیواری نے لاؤڈاسپیکر سے قیصر گنج کے جیوڈیشیل تحصیلدار کا حکم پڑھ کر سنایا اور کارروائی سے پہلے گرائے جا رہے مکانوں میں رکھے سامان کو نکالنے کی بات کی۔


قابل ذکر ہے کہ میرٹھ پولیس نے گزشتہ 15 مارچ کو پولیس کسٹڈی سے فرار ڈھائی لاکھ کے انعامی بدن سنگھ بدو اور اس کے ساتھی کے ذریعہ غیر قانونی طریقے سے زمین قبضہ کر اس پر مارکیٹ اور فیکٹری بنائے جانے پر پولیس نے کارروائی کرتے ہوئے زمین کو قبضہ سے آزاد کرایا تھا۔ اس سے پہلے بدن سنگھ بدو کی کروڑوں روپے کی کوٹھی کو بھی منہدم کیا گیا تھا۔ گزشتہ دنوں کچھ اسی طرح سے بلڈوزر کانپور میں بھی چلایا گیا جہاں اراضی مافیاؤں کے ذریعہ تالاب کی زمین پر قبضہ کر کے اس پر مکان کی تعمیر کر لی گئی تھی۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔