کرین سے کرتے تھے کار چوری، سی سی ٹی وی فوٹیج اور موبائل لوکیشن سے پکڑے گئے شاطر چور

راجستھان کے الور میں گاڑیوں کی چوری کی بڑھتی وارداتوں کے درمیان پولیس نے ایک ایسے گروہ کا پردہ فاش کیا ہے جو چوری کو انجام دینے کے لیے انوکھا اور چونکا دینے والا طریقہ استعمال کرتا تھا۔ پولیس نے دو ملزمین کو گرفتار کر لیا ہے جو کرین کی مدد سے کاریں اُٹھا کر لے جاتے تھے تاکہ کسی کو چوری کا شبہ تک نہ ہو اور وہ آسانی سے فرار ہو سکیں۔ گرفتار کئے گئے ملزمین میں ایشان سین اور گورو شرما شامل ہیں۔

 ایڈیشنل سپرنٹنڈنٹ آف پولیس شرنم کامبلے نے بتایا کہ ملزمین نے پہلے سے منصوبہ بندی کی اور کرین منگوائی۔ اس کے بعد وہ پارکنگ سے گاڑی اُٹھالے گئے۔ راہگیروں اور آس پاس کے لوگوں کو لگا کہ غلط پارکنگ کی وجہ سے شاید ایسا کر رہے ہیں۔ اس کا فائدہ اٹھاکر دونوں شاطر چوروں نے گاڑی چوری کر لی اور کسی کو شک بھی نہیں ہوا۔

پولیس کا کہنا ہے کہ یہ گینگ کافی عرصے سے اسی طریقہ کا استعمال کرکے گاڑی چوری کررہا تھا۔ ملزمین انتہائی پیشہ ورانہ انداز میں چوری کرتے تھے اور کرین ڈرائیور سے بھی ایسی بات چیت کرتے تھے کہ اسے بھی کسی غیر قانونی سرگرمی کا شبہ تک نہیں ہوتا تھا۔

واقعہ کی اطلاع ملتے ہی تھانہ کوتوالی پولیس حرکت میں آئی۔ پولیس نے علاقے کی سی سی ٹی وی فوٹیج کی جانچ کی، موبائل لوکیشن کی مددلی اور دیگر تکنیکی معلومات حاصل کیں اور ان سب کی بنیاد پر دونوں ملزمین کی شناخت ہوئی اور پھر پولیس ٹیم نے انہیں گرفتار کر لیا۔ پولیس کے مطابق ایشان سین دہلی دروازہ علاقہ کا رہنے والا ہے جبکہ گورو شرما پہاڑ گنج کا رہنے والا ہے۔

ابتدائی پوچھ گچھ کے دوران ملزمین نے اہم معلومات فراہم کی ہیں۔ پولیس اب اس بات کی تحقیقات کر رہی ہے کہ کیا ان کے ساتھ اور بھی لوگ شامل تھے یاکہیں اور اسی طرح کی چوری کی واردات کرچکے تھے۔