یوپی: وزیر اوم پرکاش راج بھر کی اچانک طبیعت بگڑی، اسپتال میں داخل

 اتر پردیش کابینہ میں وزیر اور سہیل دیو بھارتیہ سماج پارٹی کے سربراہ اوم پرکاش راج بھر کی اتوار کو اچانک طبیعت خراب ہو گئی، جس کے بعد انہیں لکھنؤ کے گومتی نگر واقع میدانتا اسپتال میں داخل کرایا گیا۔ اطلاع کے مطابق انہیں اچانک بلڈ پریشر اور ہرٹ سے جڑی کچھ پریشانی محسوس ہوئی۔ راج بھر کی طبیعت بگڑنے کی خبرملتے ہی یوپی کے نائب وزیر اعلیٰ برجیش پاٹھک فوراً ان کے گھر پہنچے اور اپنی گاڑی سے انہیں لوہیا اسپتال لے کر گئے۔ وہاں پر ڈاکٹروں کی ٹیم نے فوراً ان کا ابتدائی علاج شروع کیا اور بعد میں میدانتا اسپتال بھیج دیا۔

نائب وزیر اعلیٰ برجیش پاٹھک نے بتایا کہ اوم پرکاش راج بھر کی صحت کے بارے میں جاننے کے لیے ڈاکٹر رام منوہر لوہیا انسٹی چیوٹ آف میڈیکل سائنسز پہنچے۔ برجیش پاٹھک نے ’ایکس‘ پر اطلاع دی کہ، ’’آج اوم پرکاش راج بھر کی طبیعت خراب ہونے کی اطلاع پر انہیں فوراً اسپتال میں داخل کرایا گیا، جہاں ان کی صحت کی جانچ کی گئی اور انہیں طبی نگرانی میں رکھا گیا ہے۔‘‘

ڈاکٹروں کے مطابق راج بھر کو ہلکا برین اسٹروک آیا تھا۔ اسپتال میں ان کا فوراً سٹی اسکین اور خون سمیت کئی ضروری ٹیسٹ کروائے گئے۔ فی الحال ان کی طبیعت مستحکم بتائی جا رہی ہے۔ اسپتال کے ڈاکٹر لگاتار ان کی نگرانی کر رہے ہیں۔ اسپتال کی سیکوریٹی کو بھی بڑھا دیا گیا ہے۔

اوم پرکاش راج بھر کے بیٹے اروند راج بھر نے بھی ان کی صحت کو لے کر جانکاری شیئر کی ہے۔ اروند نے اپنے فیس بُک پوسٹ کے ذریعہ بتایا کہ اب ان کے والد کی صحت میں بہتری آ رہی ہے. بلڈ پریشر اور ہرٹ سے متعلق پریشانی محسوس ہو رہی تھی جس کے بعد انہیں اسپتال لے جایا گیا۔ فی الحال اوم پرکاش راج بھر آر ایم ایل اسپتال میں ہیں اور ڈاکٹر لگاتار ان کی صحت پر نظر بنائے ہوئے ہے۔

راج بھر کی طبیعت خراب ہونے کی خبر ملتے ہی پارٹی کارکنوں اور حامیوں میں فکر مندی پیدا ہو گئی۔ کئی رہنما اسپتال پہنچے اور ان کی جلد صحت یابی کی تمنا کی۔ سوشل میڈیا پر بھی لوگ لگاتار ان کی صحت کو لے کر دعائیں کر رہے ہیں۔