کلدیپ سنگھ سینگر آبرو ریزی، اغوا معاملے میں قصوروار قرار، سزا کا اعلان کل

تیس ہزاری عدالت میں 5 اگست کو اس معاملے کی سماعت شروع ہوئی تھی، دونوں ملزمین کے خلاف 9 اگست کو الزام طے ہو ئے تھے، اس معاملے میں 4 ماہ سے زیادہ سماعت چلی، عدالت نے عصمت دری کی متاثرہ کو نابالغ مانا ہے

تصویر سوشل میڈیا
تصویر سوشل میڈیا
user

قومی آوازبیورو

نئی دہلی: دہلی کی تیس ہزاری عدالت نے اترپردیش کے اناؤ عصمت دری اور اغوار معاملے میں پیر کو فیصلہ سناتے ہوئے بھارتیہ جنتا پارٹی (بی جےپی) کے برخاست ایم ایل اے کلدیپ سنگھ سینگر کو قصوروار ٹھہرایا سیشن جج دھرمیش سنگھ نے سینگر کو قصورواور ٹھہراتے ہوئے کہا کہ اس معاملے میں سزا کے لئے عدالت میں بحث کل ہوگی۔

حالانکہ سینگر کے وکیل سزا کے لئے آج ہی بحث چاہتے تھے۔عدالت نے اس معاملے میں ایک دیگر ملزم خاتون ششی سنگھ کو شبہ کا فائدہ دیتے ہوئے بری کردیا۔ ششی سنگھ پر متاثرہ کو بہلا پھسلا کر رکن اسمبلی کے گھر لے جانے کا الزام تھا۔


سینگر اترپردیش میں اناؤ ضلع کے بانگرمئو اسمبلی سیٹ سے بی جے پی کے ٹکٹ پر جیتا تھا۔ اس کے خلاف عصمت دری اور اغوا کے معاملے کی سماعت یہاں کی تیس ہزاری عدالت میں چل رہی تھی۔ اس کے علاوہ سینگر پر مرکزی تفتیشی بیورو(سی بی آئی) کی خصوصی عدالت میں تین معاملے چل رہے ہیں۔

یہ معاملہ 2017 کا ہے جس میں سینگر کے خلاف متاثرہ کے ساتھ عصمت دری کرنے کا معاملہ درج کیا گیا تھا۔ سی بی آئی کو یہ معاملہ 2018 میں منتقل کیا گیا تھا۔ تیس ہزاری عدالت میں پانچ اگست کو اس معاملے کی سماعت شوع ہوئی تھی، دونوں ملزمین کے خلاف نو اگست کو الزام طے کیے گئےتھے۔ اس معاملے میں چار ماہ سے زیادہ سماعت چلی، عدالت نے عصمت دری کی متاثرہ کو نابالغ مانا ہے۔


سینگر پر الزام تھا کہ نوکری دینے کا وعدہ کرکے اس نے اپنی رہائش گاہ پر متاثرہ کے ساتھ عصمت دری کی۔ متاثرہ کا اغوا کر کے اس کے ساتھ اجتماعی آبروریزی بھی کی گئی۔ عدالت کے فیصلہ سنانے کے بعد وہاں موجود سینگر رونے لگا جبکہ دوسری ملزم ششی سنگھ فیصلے کے بعد بے ہوش ہوگئی۔

متاثرہ اور اس کی ماں کے یوگی آدتیہ ناتھ کی لکھنؤ واقع رہائش گاہ کے باہر خودکشی کرنے کی کوشش کے بعد اس معاملے نے طول پکڑ لیا۔ اس کے بعد سپریم کورٹ کے حکم سے اناؤ معاملے کی جانچ لکھنؤ سے دہلی منتقل کی گئی تھی۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔