پاکستان میں ہندوستانی ہائی کمیشن کے دو افسران لاپتہ، تلاش جاری

پاکستان میں ہندوستانی ہائی کمیشن دفتر میں کام کرنے والے دو ہندوستانی افسران لاپتہ ہیں اور اس سلسلے میں حکومت ہند نے پاکستان سے بات چیت کی ہے۔ ہندوستان نے اس سلسلے میں پاکستان کے نائب سفیر کو ایک اعتراض نامہ جاری کیا ہے جس میں دو ہندوستانی افسران کے لاپتہ ہونے پر ناراضگی ظاہر کی گئی ہے۔ اس واقعہ سے ہندوستان اور پاکستان کے درمیان رشتوں میں جاری تلخیاں مزید بڑھ گئی ہیں۔

خبروں کے مطابق ابھی کچھ دن پہلے ہی پاکستان میں ہندوستانی سفارت خانہ کے کارگزار ہائی کمشنر گورو اہلووالیہ کی کار کا پاکستانی خفیہ ایجنسی آئی ایس آئی کے ایک رکن نے موٹر سائیکل سے پیچھا کیا تھا۔ بتایا جاتا ہے کہ آئی ایس آئی نے گورو اہلووالیہ کا استحصال کرنے اور ان پر نظر رکھنے کے لیے ان کی رہائش کے باہر کئی کاروں اور بائکوں کا جماؤڑا لگا دیا تھا۔

مارچ کے مہینے پاکستان میں ہندوستانی ہائی کمیشن نے اسلام آباد میں وزارت خارجہ کو مخالفت ظاہر کرتے ہوئے ایک خط بھیجا تھا جس میں پاکستانی افسران کے ذریعہ ان کے افسران اور ملازمین کے لگاتار استحصال کو لے کر ناراضگی ظاہر کی گئی تھی۔ ہندوستان نے پاکستانی افسران سے کہا تھا کہ ان واقعات کی فوری جانچ کی جائے اور متعلقہ ایجنسیوں کو یہ یقینی کرنے کی ہدایت دی کہ اس طرح کا واقعہ آگے نہ ہو۔