تمل ناڈو: دو بچوں کی ڈینگو بخار کے سبب موت

چنئی: تمل ناڈو کے ضلع ترولَّور میں منگل کے روز ڈینگو سے دو بچوں کی موت ہوگئی۔ ذرائع نے بتایا کہ ضلع میں اب تک پانچ افراد کی موت ڈینگو جیسی علامتوں والی بیماری سے ہوچکی ہے۔ بعد ازاں حکومت نے پوری ریاست سے زیادہ صفائی اہلکاروں کو تعینات کر کے اس کی روک تھام کے لیے اقدام کیے ہیں۔

ریاست کے تمام اضلاع اور سرکاری اسپتالوں میں کافی دوائیوں کا ذخیرہ ہے جبکہ صحت افسران سے کہا گیا ہے کہ وہ صورتحال پر قریب سے نظر رکھیں اور ضروری اقدام کریں۔

ریاست کے وزیر صحت ڈاکٹر سی وجے بھاسکر نے تھوتھوکُڈِّی گورنمنٹ میڈیکل کالج اور اسپتال کا معائنہ کرنے کے بعدصحافیوں سے کہا، ’سرکاری اسپتالوں میں بخار کی جانچ کروانے کے لیے آنے والے مریضوں میں تقریباً 10 فیصد مریضوں میں ڈینگو کی علامت پائی گئی ہیں۔ مانسون محکمہ موسمیات کے لیے چیلنج سے پُر ہے لیکن ہم کسی بھی صورتحال سے نمٹنے کے لیے تیار ہیں‘۔

خیال رہے کہ ضلع میں پیر کو تیروٹَّانی کے پاس ڈینگو سے 21 برس کی خاتون کی موت ہوگئی تھی۔