بحیرہ عرب میں ہلچل! ہند-پاک بحریہ کر رہی ہے فائرنگ مشق، وارننگ جاری

پہلگام حملہ اور آپریشن سندور کے بعد سے ہندوستان اور پاکستان کے درمیان زبردست کشیدگی کا ماحول ہے۔ آپریشن سندور کے دوران ہندوستانی بحری افواج کو اپنی طاقت کا مظاہرہ کرنے کا موقع نہیں ملا تھا لیکن اب وہ بحیرہ عرب میں ہلچل پیدا کرنے والے ہیں۔ دراصل ہندوستان اور پاکستان کی بحریہ ایک ہی وقت پر فائرنگ ڈرل کرنے جا رہی ہے اور اسے لے کر دونوں ملکوں کی بحریہ نے نیویگیشن ایریا وارننگ جاری کی ہے۔

ہندوستان اور پاکستان کی بحریہ اپنے اپنے علاقے میں سب سرفیس فائرنگ ڈرل کرے گی۔ اس کے تحت مرین ٹریفک کو مشق کے علاقے سے دور رہنے کا انتباہ کیا گیا ہے۔ پاکستان کی طرف سے جاری نویریا وارننگ کے مطابق 11 اگست کی صبح 4 بجے سے 12 اگست کی شام 4 بجے تک مرین ٹریفک کے مشق کے علاقے سے دور رہنے کی وارننگ جاری کی گئی ہے۔

دونوں ملکوں کے مشق مقام تقریباً 60 ناٹیکل میل کی دوری پر ہوں گے، جس کی وجہ سے سیکوریٹی ایجنسیاں کافی الرٹ ہیں۔ موجودہ حالات اور بڑھتی ہوئی کشیدگی کے درمیان یہ سرگرمی اسٹریٹیجک نقطہ نظر سے اہم تسلیم کی جا رہی ہے۔ ہندوستانی بحریہ کا مشق گجرات کے پوربندر اور اوکھا کے سمندری ساحل پر کیا جائے گا۔ اس کے ساتھ ہی ہندوستان اور پاکستان دونوں ملکوں نے سمندری علاقے میں فائرنگ مشق کے لیے اطلاع جاری کی ہے۔

اس مشق کا مقصد نہ صرف فوجی تیاریوں کو پرکھنا ہے بلکہ علاقائی سطح پر اسٹریٹیجک پیغام بھی دینا ہے۔ موجودہ ماحول میں یہ معاملہ دونوں ملکوں کی سمندری پالیسیوں میں بڑھتے ہوئے فوکس کو بھی ظاہر کرتا ہے۔