تمل ناڈو میں ریلوے ٹریک پار کر رہی اسکول بس کو ٹرین نے ماری ٹکر، 3 بچوں کی موت، کئی شدید طور پر زخمی

تمل ناڈو کے کڈلور ضلع کے چیمن کوپّم علاقے میں منگل کی صبح ایک دردناک حادثہ پیش آیا۔ یہاں تیز رفتار سے آ رہی ٹرین نے بغیر پھاٹک والے ریلوے کراسنگ پر اسکول بس کو زوردار ٹکر مار دی۔ اس خوفناک حادثے میں تین معصوم بچوں کی جان چلی گئی جبکہ دیگر 10 بچوں اور گاڑی ڈرائیور کے زخمی ہونے کی خبر ہے۔

یہ حادثہ اس وقت ہوا جب اسکول بس ٹریک پار کرنے کی کوشش کر رہی تھی، تبھی چدمبرم جا رہی ایک مسافر ٹرین نے اسکول گاڑی کو ٹکر مار دی اور اسے قریب 50 میٹر تک گھسیٹ لیا۔ ٹکر اتنی شدید تھی کہ اسکول بس پوری طرح سے تہس نہس ہو گئی۔ حادثے میں تین بچوں نے موقع پر ہی دم توڑ دیا۔ حالانکہ ابھی مرنے والے بچوں کی شناخت نہیں ہو سکی ہے۔

چشم دیدوں کے مطابق بس میں اسکولی بچے سوار تھے۔ حادثے کے بعد زخمی بچوں اور ڈرائیور کو فوراً کڈلور کے سرکاری اسپتال لے جایا گیا جہاں ان کی حالت نازک بنی ہوئی ہے۔ ڈاکٹروں کا کہنا ہے کہ مرنے والوں کی تعداد میں اضافہ ہو سکتا ہے۔

مقامی لوگوں اور ریلوے افسروں کے مطابق یہ حادثہ بس ڈرائیور کی لاپروائی کی وجہ سے پیش آیا۔ بتایا جا رہا ہے کہ ڈرائیور نے ٹرین کو دیکھنے کے باوجود جلدبازی میں ٹریک پار کرنے کی کوشش کی۔ ریلوے پروٹیکشن فورس (آر پی ایف) اور ضلع انتظامیہ نے حادثے کی تحقیقات شروع کر دی ہے تاکہ اس کی اصل وجہ کا پتہ لگایا جا سکے اور ذمہ داروں کو سزا دی جائے۔

اس خوفناک حادثے کی خبر پھیلتے ہی علاقے میں غم و غصے کی لہر دوڑ گئی۔ مقامی لوگ موقع پر جمع ہو گئے اور ریلوے کراسنگ پر تحفظاتی انتظامات کی کمی کو لے کر ناراضگی ظاہر کی۔ ان کا کہنا ہے کہ اسکولوں کے آس پاس بغیر پھاٹک والے کراسنگ خطرناک ہیں اور انہیں فوراً ٹھیک کرنا چاہیے۔ حادثے کی آواز سن کر سب سے پہلے مقامی لوگ ہی وہاں پر پہنچے اور انہوں نے پھنسے ہوئے بچوں کو نکالنے کی کوشش کی اور راحت و بچاؤ دستہ کے آنے تک پوری مدد کرتے رہے۔

حادثے سے شدید ناراض لوگوں نے ریلوے اور انتظامیہ کے خلاف نعرے بازی کی اور اسکولوں کے پاس تحفظ بڑھانے کا مطالبہ کیا۔ افسروں نے یقین دہانی کرائی ہے کہ جانچ کے نتیجے کی بنیاد پر سخت اقدامات کیے جائیں گے۔ حادثے کی پوری جانچ جاری ہے۔