شراب نوشی کے لئے پیسے نہ دینے پر تین نوجوانوں کی درخت سے باندھ کر پٹائی

سیہور: مدھیہ پردیش کے سیہور ضلع کے آشٹا میں پرانی اندور۔ بھوپال شاہراہ پر درگاہ کے نزدیک تین نوجوانوں کو درخت سے باندھ کر پٹائی کرنے کا معاملہ سامنے آیا ہے۔ پولیس نے معاملہ درج کرکے ایک ملزم کو گرفتار کرلیا، جبکہ دو دیگر کو تلاش کیا جا رہا ہے۔

پولیس ذرائع کے مطابق اروند اپنے چچیرے بھائی پپو اور اجے کے ساتھ اپنے گاؤں سے موٹر سائیکل پر سوار ہوکر کل آشٹا کپڑے لینے جارہا تھا۔ اسی دوران تینوں بھائیوں نے کپڑے خریدے اور جب وہ تینوں بھوپال ناکہ کے نزدیک درگاہ کے پاس سے گزر رہے تھے تو ان کی گاڑی کا پٹرول ختم ہوگیا۔ وہ گاڑی کو دھکا لگاکر پٹرول پمپ تک جا رہے تھے کہ شراب کی دکان کے نزدیک انہیں ایک شخص بھرت ملا جو اپنے دوستوں کے ساتھ شراب پی رہا تھا۔

بھارت نے اروند کو اپنے پاس بلاکر اس سے شراب کے لئے 1500 روپے مانگے۔ روپے نہ دینے پر اروند اور اس کے بھائیوں کے ساتھ ملزم بھرت اور اس کے ساتھیوں نے مار پیٹ کی۔ جس سے تینوں لوگ زخمی ہوگئے۔ اطلاع ملنے پر پولیس موقع پر پہنچی، جہاں بھارت کو پولیس نے گرفتار کرلیا جبکہ اس کے دو ساتھی فرار ہوگئے۔ آشٹا پولیس نے مختلف دفعات کے تحت ملزم بھرت کشواہا اور اس کے دو دوستوں کے خلاف معاملہ درج کرکے دونوں ساتھیوں کی تلاش شروع کردی ہے، اس موقع کا ویڈیو بھی وائرل ہوگیا ہے۔