گجرات: مالی تنگی سے متاثر کنبے کے چھ افراد نے کھایا زہر، تین کی موت

کسانوں کی خودکشی کی خبریں آئے دن سننے میں آتی رہی ہیں لیکن ملک میں مالی بحران نے جوشدت اختیار کر لی ہےاس کی وجہ سے دیگر شعبوں سے تعلق رکھنے والےافراد کی بھی پریشانیاں شدت اختیار کرتی جا رہی ہیں ۔ خبر ہےکہ گجرات میں وڈودرا شہر کے سما علاقے میں مبینہ طور پر مالی بحران کے شکار ایک کنبے کے سبھی چھ افراد نے زہر پی لیا۔ ان میں سے تین افراد کی موت ہوگئی ہے۔

پولیس نے بتایا کہ مبینہ طورپر سواتی سوسائٹی میں ایک کرائے کے مکان میں رہنے والے نریندر سونی، ان کے بیٹے بھاون، بیوی دپتی بین، پوتی ریا اور بہو اروشی اور پوتے پارتھ نے زہریلی دوا پی لی۔ ان میں سے ریا (16)، پارتھ (4) اور نریندر سونی ( تقریباً 52 برس) کی موت ہوگئی اور دیگر تین اسپتال میں زیر علاج ہیں۔

اس کنبے کا تعلق بنیادی طور پر اودے پور ضلع سے ہے اور اس کا زیورات کا کاروبار تھا۔ اسی سوسائٹی میں پہلے ان کا اپنا مکان تھا جو بعد میں فروخت کرنا پڑا تھا۔پولیس گہرائی سے چھان بین کررہی ہے۔

چھوٹے کاروباری پہلے نوٹ بندی سے بےانتہا پریشان ہوئے اور پھر جی ایس ٹی کی وجہ سے ان کےکاروبار پوری طرح تباہ ہوگئے جس کی وجہ سےان میں سے ایک بڑی تعدادکو اپنا کاروبار بند کرنا پڑا۔یہ لوگ اب چھوٹی موٹی نوکری کرنے پر مجبور ہیں۔