مذہب کی دیوار نے بیٹے کو ماں سے کیا دور، بچھڑی ہوئی ماں 25 سال بعد بیٹے سے مل کر بھی رہی خالی ہاتھ!

تقریباً 25 سال بعد اپنی فیملی سے بچھڑی ہوئی ضعیفہ کی ملاقات بیٹے اور گھر والوں سے ہوئی، لیکن یہ ملاقات وہ خوشیاں نہ دے سکیں جس کی امید ایک ماں نے کی تھی۔ اس ماں کے بیٹے نے اسے اپنانے سے انکار کر دیا، اور اس کی وجہ یہ تھی کہ خاتون نے ہندو مذہب چھوڑ کر بہت پہلے ہی عیسائی مذہبا ختیار کر لیا تھا۔ بیٹے نے اپنی بچھڑی ہوئی ماں کے سامنے یہ شرط رکھ دی کہ اگر وہ عیسائی مذہب چھوڑ کر ہندو مذہب اختیار کر لے، تو گھر میں جگہ دینے کے لیے راضی ہو سکتا ہے۔

میڈیا رپورٹس کے مطابق جھارکھنڈ کے گوڈا ضلع کی رہنے والی ایک خاتون 25 سال قبل لاپتہ ہو گئی تھی۔ تقریباً 70 سال کی اس خاتون کا کہنا ہے کہ اپنے شوہر کی موت کے بعد گھر سے نکلی تھی اور بھٹک کر کولکاتا پہنچ گئی۔ وہاں ایک شیلٹر ہوم میں اسے پناہ ملی۔ خاتون گزشتہ 25 سالوں سے کولکاتا کے شیلٹر ہوم میں ہی زندگی گزار رہی تھی۔ اس دوران خاتون کو مشنری کے لوگ ملے اور ان لوگوں نے خاتون کی مدد کی۔ ان سے متاثر ہو کر خاتون نے عیسائی مذہب اختیار کر لیا تھا۔

بتایا جاتا ہے کہ شیلٹر ہوم میں ضعیفہ کو اپنے گھر والوں کی بہت یاد آتی تھی۔ گھر والوں کو یاد کرتا دیکھ کر شیلٹر ہوم کے ملازمین نے خاتون کے گھر والوں کو تلاش کرنا شروع کیا۔ کسی طرح خاتون کے گھر والوں کا پتہ چل گیا۔ یہ انتظام کیا گیا کہ ضعیفہ ویڈیو کال پر گوڈا کے گاؤں دہوپ نگر میں رہنے والے بیٹے سے بات کرے۔ ماں اور بیٹے کی بات چیت بھی ہوئی، لیکن جب بیٹے کو پتہ چلا کہ اس کی ماں نے عیسائی مذہب اختیار کر لیا ہے، تو اس نے ماں کو اپنے گھر میں جگہ دینے سے انکار کر دیا۔

موصولہ خبروں میں بتایا جا رہا ہے کہ بیٹے کو یہ جان کر بہت تکلیف ہوئی کہ اس کی ماں ہندو مذہب چھوڑ کر عیسائی مذہب اختیار کر چکی ہے۔ یہ جانکاری ملنے کے بعد بیٹے نے کہا کہ اگر اس کی ماں عیسائی مذہب چھوڑ کر ہندو مذہب اختیار کر لیتی ہے تو وہ انھیں اپنانے کے لیے تیار ہے۔ حالانکہ ضعیفہ نے عیسائی مذہب چھوڑنے سے انکار کر دیا ہے۔ وہ اس بات سے بے حد مایوس بھی ہوئی کہ اس کے اپنے بیٹے نے صرف اس لیے اپنانے سے انکار کر دیا کہ وہ اب ہندو مذہب چھوڑ چکی ہے۔