’ریاست کا سیاسی منظرنامہ بدلے گا‘، یوپی کانگریس کی نومنتخب صدر آرادھنا مشرا کا عزم

اتر پردیش کانگریس کمیٹی کی نو منتخب صدر آرادھنا مشرا (مونا) نے ہفتے کے روز اعلیٰ قیادت کا شکریہ ادا کیا۔ انہوں نے اعتماد ظاہر کیا کہ انڈیا اتحاد مضبوط ہو رہا ہے اور ریاست کا سیاسی منظرنامہ بدلنے والا ہے۔ آرادھنا مشرا نے نیوز ایجنسی ’آئی اے این ایس‘ سے بات کرتے ہوئے کہا کہ سب سے پہلے مجھے اس ذمہ داری کے لیے منتخب کرنے پر میں اعلیٰ قیادت کا شکریہ ادا کرتی ہوں۔ ہمارا خاندان 4 نسلوں سے کانگریس کے ساتھ وابستہ رہا ہے۔ میں صرف اتنا ہی کہوں گی کہ میں پوری وفاداری اور ایمانداری کے ساتھ اس عہدے کے وقار کو برقرار رکھوں گی۔

اتر پردیش میں کانگریس کے لیے سیٹوں کو لے کر عمران مسعود کے بیان پر آرادھنا مشرا نے کہا کہ یہ فیصلہ اعلیٰ قیادت کا ہے اور مجھے پورا بھروسہ ہے کہ اعلیٰ قیادت جو بھی فیصلہ کرے گی، اس میں کانگریس کے ہر کارکن کے جذبات اور پارٹی کے وقار کا خیال رکھا جائے گا۔ بہوجن سماج پارٹی (بی ایس پی) کے سابق قومی کوآرڈینیٹر آکاش آنند اور پارٹی سپریمو مایاوتی کے بارے میں آرادھنا مشرا نے کہا کہ یہ بی ایس پی کا اندرونی معاملہ ہے۔ حالانکہ اس طرح کسی بھی شخص یا پارٹی کی سیاسی ساکھ کمزور ہوتی ہے۔

کانگریس کی نومنتخب صدر نے مزید کہا کہ مایاوتی ایک بہت سینئر لیڈر ہیں۔ وہ اپنی پارٹی اور برادری کے لیے جو بھی فیصلہ کریں گی، وہ ان کا اپنا فیصلہ ہوگا اور وہ اپنی سمجھ بوجھ سے ہی لیا جائے گا۔ وزیر اوم پرکاش راج بھر کے اس بیان پر کہ سہیل دیو بھارتیہ سماج پارٹی کے امیدوار سماج وادی پارٹی کو ووٹ دیں گے، آرادھنا مشرا نے کہا کہ جیسے جیسے انڈیا اتحاد مضبوط ہوگا، مستقبل میں اس کے مزید ثبوت ملیں گے۔ ایک قسم کی گھبراہٹ پھیل گئی ہے، بھگدڑ مچی ہوئی ہے۔