بہار میں لاک ڈاؤن 25 مئی تک بڑھانے کا فیصلہ، وزیر اعلیٰ نتیش کمار نے کیا ٹوئٹ

لاک ڈاؤن کے ضابطے کیا ہوں گے، اس سلسلے میں بہار کے چیف سکریٹری، ڈیولپمنٹ کمشنر، پولس ڈائریکٹر جنرل، ایڈیشنل چیف سکریٹری (داخلہ) شام 4.40 بجے ورچوئل پریس کانفرنس میں جانکاری دیں گے۔

تصویر یو این آئی
تصویر یو این آئی
user

تنویر

بہار میں کورونا قہر پر قابو پانے کے لیے وزیر اعلیٰ نتیش کمار نے لاک ڈاؤن کی مدت میں 10 دنوں کا اضافہ کرنے کا فیصلہ کیا ہے۔ انھوں نے اپنے ایک ٹوئٹ میں اعلان کیا ہے کہ بہار میں لاک ڈاؤن اب 15 مئی تک نہیں بلکہ 25 مئی تک نافذ رہے گا۔ انھوں نے لکھا ہے کہ ’’آج ساتھی وزراء اور افسران کے ساتھ بہار میں نافذ لاک ڈاؤن کی حالت کا جائزہ لیا گیا۔ لاک ڈاؤن کا مثبت اثر دیکھنے کو مل رہا ہے۔ اس لیے بہار میں اگلے 10 دنوں یعنی 16 سے 25 مئی 2021 تک لاک ڈاؤن کی توسیع کرنے کا فیصلہ لیا گیا ہے۔‘‘

یہاں قابل ذکر بات یہ ہے کہ بڑھے ہوئے لاک ڈاؤن کے ضابطے کیا ہوں گے، اس سلسلے میں بہار کے چیف سکریٹری، ڈیولپمنٹ کمشنر، پولس ڈائریکٹر جنرل، ایڈیشنل چیف سکریٹری (داخلہ) شام 4.40 بجے منعقد ورچوئل پریس کانفرنس میں جانکاری دیں گے۔ رواں لاک ڈاؤن میں ضروری سامانوں کی خریداری کے لیے صبح 11 بجے تک لوگوں کو گھروں سے نکلنے کی چھوٹ ہے، امکان ظاہر کیا جا رہا ہے کہ اس وقت میں تھوڑا اضافہ کیا جا سکتا ہے۔


واضح رہے کہ نتیش کمار نے کل اپنا ایک ویڈیو پیغام ٹوئٹ کیا تھا جس میں لاک ڈاؤن کی توسیع سے متعلق اشارہ دے دیا تھا۔ انھوں نے اپنے بیان میں کہا تھا کہ ’’کورونا وبا سے راحت پہنچانے کے لیے کئی اقدام کیے گئے ہیں۔ ٹیسٹنگ بڑھی ہے اور بنیادی ڈھانچے کا انتظام کیا گیا ہے۔ گزشتہ سال کی طرح اس بار بھی عزم مصمم، مثبت سوچ کے ساتھ بہار کے باشندے کورونا کے خلاف اس جنگ میں کامیاب ہوں گے۔ حوصلہ اور صبر بنائے رکھیں۔‘‘

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔