کیپٹن امرندر کے ساتھ انتخابی اتحاد پر بی جے پی نے بھی لگائی مہر

مرکزی وزیر اور بی جے پی کے پنجاب الیکشن انچارج گجیندر سنگھ شیخاوت نے کہا کہ ’’یہ طے ہے کہ ہم (بی جے پی اور کیپٹن امرندر) ساتھ مل کر الیکشن لڑیں گے، سیٹوں کی تقسیم پر بعد میں مطلع کیا جائے گا۔‘‘

کیپٹن امریندر سنگھ، تصویر آئی اے این ایس
کیپٹن امریندر سنگھ، تصویر آئی اے این ایس
user

یو این آئی

نئی دہلی: پنجاب کے سابق وزیراعلی کیپٹن امریندر سنگھ نے پنجاب اسمبلی انتخابات کے لیے بھارتیہ جنتا پارٹی (بی جے پی) کے ساتھ اتحاد کا باقاعدہ اعلان کر دیا ہے۔ کیپٹن امرندر سنگھ نے جمعہ کو یہاں مرکزی وزیر اور بی جے پی کے پنجاب انتخابات کے انچارج گجیندر سنگھ شیخاوت سے ملاقات کی۔ اس ملاقات کے بعد انہوں نے مسٹر شیخاوت کے ساتھ گلے ملتے ہوئے تصویر کو ٹوئٹ کیا۔

کیپٹن امرندر سنگھ نے اپنے ٹوئٹ میں لکھا کہ پنجاب اسمبلی انتخابات کے لئے پنجاب لوک کانگریس اور بی جے پی کے مابین اتحاد پر رضامندی ہوگئی ہے اور دونوں سیاسی جماعتوں کے مابین سیٹ کی تقسیم پر فیصلہ جلد ہوسکتا ہے۔ کیپٹن امرندر نے انتخابات میں جیت کا دعوی کرتے ہوئے کہا کہ کون کس سیٹ پر جیت سکتا ہے، اسی بنیاد پر سیٹوں کی تقسیم ہوگی۔ ہر سیٹ پر تفصیلی بات چیت کی جائے گی۔


شیخاوت نے بھی ایک ٹوئٹ کر کے کہا کہ پنجاب کے سابق وزیر اعلی اور پنجاب لوک کانگریس کے بانی کیپٹن سنگھ آج دہلی رہائش گاہ پر آئے۔ ان سے بات چیت میں ان کا طویل سیاسی تجربہ نظر آتا ہے۔ وہ پنجاب کے عوام کا مفاد چاہتے ہیں۔ اس سلسلہ میں ہمارے درمیان خیالات کا تبادلہ ہوا۔ شیخاوت نے مزید کہا کہ آج کی بات چیت کے بعد میں کہہ سکتا ہوں کہ یہ طے ہے کہ ہم ساتھ مل کر الیکشن لڑیں گے۔ سیٹوں کی تقسیم پر صحیح وقت پر مطلع کیا جائے گا۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔