انتخابی منشور جاری نہ کرنے پر تیجسوی کا نتیش پر طنز ’بی جے پی سے اتنا مت ڈریئے‘

لوک سبھا انتخاب کے آخری مرحلہ سے ٹھیک پہلے آر جے ڈی لیڈر تیجسوی یادو نے ایک بار پھر بہار کے وزیر اعلیٰ نتیش کمار پر حملہ کیا ہے۔ جنتا دل یو کے ذریعہ اب تک انتخابی منشور جاری نہیں کیے جانے پر طنز کستے ہوئے انھوں نے کہا کہ نتیش جی آپ کو بی جے پی سے ڈرنے کی ضرورت نہیں ہے۔

تیجسوی یادو نے ٹوئٹ کر کہا کہ ’’آخری مرحلہ کے آخری دن تو کم از کم اپنا انتخابی منشور جاری کر دیجیے۔ بی جے پی سے اتنا بھی مت ڈریئے۔ ورنہ لوگ کہیں گے کہ ایک بہاری وزیر اعلیٰ باہریوں سے ڈر گیا۔ اصول، پالیسی، نیت، ضابطہ، اخلاقیات، آزاد نظریہ کچھ بچا ہے کہ نہیں؟ چاچا جی، کیا حال بنا لیا آپ نے؟‘‘

دراصل لوک سبھا انتخاب کے پیش نظر جنتا دل یو نے ابھی تک اپنا انتخابی منشور جاری نہیں کیا ہے جب کہ مہاگٹھ بندھن میں شامل سبھی پارٹیوں نے اپنا اپنا الگ انتخابی منشور جاری کیا ہے۔ یہاں تک کہ این ڈی اے میں بھی ایل جے پی اور بی جے پی کے انتخابی منشور جاری ہو چکے ہیں۔ جنتا دل یو کے انتخابی منشوری جاری نہیں ہونے پر آر جے ڈی لگاتار حملہ آور ہے۔

دوسری طرف آر جے ڈی صدر لالو پرساد یادو نے بھی پی ایم مودی اور بہار کے وزیر اعلیٰ نتیش کمار پر حملہ کیا ہے۔ انھوں نے ٹوئٹ کر طنزیہ انداز میں کہا ہے کہ ’’مہاگراوٹی دوسروں کو مہاملاوٹی بول رہے ہیں۔‘‘

واضح رہے کہ آخری مرحلہ میں بہار کی 8 سیٹوں پر 19 مئی کو پولنگ ہے اور انتخابات کے نتائج 23 مئی کو منظر عام پر آئیں گے۔