تیجسوی یادو کا نتیش کمار پر حملہ، کہا – ’یہ ان کی آخری کابینہ توسیع، 2025 میں این ڈی اے ختم ہو جائے گی‘

راشٹریہ جنتا دل (آر جے ڈی) کے رہنما تیجسوی یادو نے بہار کے وزیر اعلیٰ نتیش کمار پر سخت حملہ کیا ہے۔ انہوں نے ریاست میں کابینہ توسیع پر تبصرہ کرتے ہوئے کہا کہ یہ وزیر اعلیٰ کا حق ہے لیکن یہ ان کی آخری کابینہ توسیع ہوگی۔ تیجسوی نے مزید کہا کہ 2025 میں این ڈی اے ختم ہو جائے گا کیونکہ بہار کے عوام اس حکومت سے تنگ آ چکے ہیں۔

تیجسوی یادو نے ریاست کی موجودہ حکومت پر بھی شدید تنقید کی اور کہا کہ بہار میں گزشتہ دس سالوں سے ڈبل انجن کی حکومت ہے، لیکن اب نتیش کمار ریاست چلانے کے قابل نہیں رہے۔ ان کا کہنا تھا کہ وزیر اعلیٰ کا عوام سے کوئی رابطہ نہیں ہے اور ان کی ساکھ مسلسل گر رہی ہے۔ تیجسوی نے کہا، ’’نتیش کمار کی شبیہ خراب ہو رہی ہے اور اب بہار کے عوام 'کھٹارا' گاڑی نہیں چلانا چاہتے بلکہ نئی قیادت کو آزمانا چاہتے ہیں۔’’

انہوں نے مزید کہا کہ یہ بہار حکومت کی کابینہ توسیع نہیں تھی بلکہ بھارتیہ جنتا پارٹی (بی جے پی) کی کابینہ توسیع تھی۔ انہوں نے الزام لگایا کہ بی جے پی، جنتا دل یونائیٹڈ (جے ڈی یو) کو ختم کرنا چاہتی ہے اور اسی حکمت عملی کے تحت جے ڈی یو کے بڑے رہنماؤں کو بی جے پی کے قریب لایا جا رہا ہے۔ تیجسوی کے مطابق، "جے ڈی یو کے کئی رہنماؤں کا جسم تو پارٹی میں ہے، لیکن ان کا ذہن اور دماغ بی جے پی کے ساتھ ہے۔"

تیجسوی یادو نے بی جے پی اور این ڈی اے پر سخت الفاظ میں حملہ کرتے ہوئے کہا کہ چاہے وہ جے ڈی یو ہو، بی جے پی ہو یا این ڈی اے، یہ لوگ اگلے دس سالوں تک بہار کی سیاست میں واپس نہیں آئیں گے۔ انہوں نے دعویٰ کیا کہ بہار کے عوام نے اب این ڈی اے کو مسترد کر دیا ہے اور وہ ایک نئی قیادت کی تلاش میں ہیں۔

ان کے ان بیانات سے واضح ہے کہ بہار کی سیاست میں تناؤ بڑھ رہا ہے اور 2025 کے انتخابات سے قبل سیاسی ہلچل میں مزید شدت آ سکتی ہے۔