’سماج کو زہر آلود کرنے بہار آ رہے ہیں امت شاہ‘، وزیر داخلہ کے دورۂ بہار پر تیجسوی یادو نے اٹھایا سوال

بہار میں بی جے پی کے اقتدار سے باہر ہونے کے بعد امت شاہ پہلی بار 23 ستمبر کو سیمانچل کے دو روزہ دورے پر بہار پہنچ رہے ہیں، وہ 23 ستمبر کو پورنیہ میں ایک جلسہ عام سے خطاب کریں گے۔

تیجسوی یادو، تصویر یو این آئی
تیجسوی یادو، تصویر یو این آئی
user

قومی آوازبیورو

بی جے پی لیڈر اور مرکزی وزیر داخلہ امت شاہ کے آئندہ بہار دورے کو لے کر ریاست کے نائب وزیر اعلیٰ تیجسوی یادو نے آج تلخ حملہ کیا ہے۔ تیجسوی یادو نے کہا کہ ’’امت شاہ بہار آ رہے ہیں تو بتائیے کہ خصوصی ریاست کا درجہ دیں گے یا نہیں؟ ایک بات تو سب کے من میں ہے کہ آنے کا مقصد کیا ہے؟ سماج کو زہر آلود کرنا ہی ان کے دورہ کا مقصد ہے۔ امت شاہ آ کر یہی بولیں گے کہ جنگل راج آ گیا ہے۔‘‘

مرکزی وزیر داخلہ اور بی جے پی کے سابق صدر امت شاہ 23 اور 24 ستمبر کو بہار کے سیمانچل کا دورہ کرنے والے ہیں۔ اس دورے کو لے کر بہار بی جے پی کے تمام بڑے لیڈران سے لے کر دیگر ریاستوں کے بھی کئی بی جے پی لیڈر جی توڑ محنت کر رہے ہیں۔ مانا جا رہا ہے کہ امت شاہ سیمانچل کے دورے سے بہار میں بی جے پی کی مہم کا آغاز کرنے جا رہے ہیں۔ ایسے میں ان کا یہ دورہ موضوعِ بحث بنا ہوا ہے۔


اس درمیان شاہ کے دورے سے پہلے جمعرات کو تیجسوی یادو نے کئی سوال کھڑے کیے ہیں۔ تیجسوی نے جہاں بہار کے خصوصی ریاست کا درجہ اور اسپیشل پیکیج کو لے کر سوال اٹھائے، وہیں پوچھا کہ ان کے آنے کا مقصد کیا ہے؟ صحافیوں سے بات کرتے ہوئے تیجسوی نے کہا کہ ’’امت شاہ آ رہے ہیں تو بتائیے کہ خصوصی ریاست کا درجہ دیں گے یا نہیں؟‘‘

پارٹی دفتر پہنچے تیجسوی یادو کا کہنا ہے کہ ایک سوال تو سبھی کے من میں ہے کہ ان کے بہار آنے کا مقصد کیا ہے؟ سماج کو زہر آلود کرنا ہی ان کے آنے کا مقصد ہے۔ انھوں نے کہا کہ امت شاہ آ کر یہی بولیں گے کہ جنگل راج آ گیا ہے۔ مسلمانوں کے خلاف بولیں گے اور ہندوؤں کو مشتعل کریں گے، بس اتنا ہی تو کرتے ہیں۔


واضح رہے کہ وزیر داخلہ امت شاہ 23 ستمبر کو سیمانچل کے دو روزہ دورے پر پہنچ رہے ہیں۔ بہار میں بی جے پی کے اقتدار سے باہر ہونے کے بعد امت شاہ کا یہ پہلا دورۂ بہار ہے۔ امت شاہ 23 ستمبر کو پورنیہ میں ایک جلسہ عام سے خطاب کریں گے، اور پھر 24 ستمبر کو کشن گنج میں میٹنگ کریں گے۔ شاہ کے اس دورے کو بہت اہم تصور کیا جا رہا ہے۔ گزشتہ لوک سبھا انتخاب میں بی جے پی قیادت والے این ڈی اے نے ریاست کی 40 لوک سبھا سیٹوں میں سے 39 سیٹوں پر جیت حاصل کی تھی۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔