تمل ناڈو: راجیو گاندھی کے یوم پیدائش پر سِلائی مشینیں اور ساڑیاں تقسیم

وانمباڑی: آنجہانی سابق وزیر اعظم راجیو گاندھی کے 75ویں یوم پیدائش کے موقع پر ویلور سینٹرل اور ویسٹ کانگریس اقلیتی شعبہ کی جانب سے تمل ناڈو میں ویلور ضلع کے وانمباڑی میں ایک تقریب کا انعقاد کیا گیا۔ تمل ناڈو کانگریس کمیٹی اقلیتی شعبہ کے ریاستی چیئرمین ڈاکٹر اسلم باشاہ نے اجلاس کی صدارت کی اور ضرورت مندگان میں سلائی مشینیں اور ساڑیاں تقسیم کیں۔

تقریب کے دوران ریاستی نائب چیئرمین کے جی ایم جاوید خان اور کرشنگری ایسٹ چیئرمین شفیق احمد مہمان خصوصی کے طور پر شریک رہے۔

اس موقع پر راجیو گاندھی کو خراج عقیدت پیش کرتے ہوئے تمل ناڈو کانگریس کمیٹی اقلیتی شعبہ کے چیئرمین ڈاکٹر اسلم باشاہ نے کہا کہ آج ہم ہمارے قد آور لیڈر راجیو گاندھی جی کی 75ویں سالگرہ منا رہے ہیں۔ راجیو گاندھی ایک محب وطن اور دور اندیش سیاسی لیڈر تھے جنہوں نے اپنے دور اقتدار میں ہندوستان کی ترقی میں اہم کردار نبھایا ہے۔

دریں اثنا، ڈاکٹر اسلم باشاہ نے حاضرین سے خطاب بھی کیا۔ اپنے خطاب کے دوران انہوں نے کہا کہ بھارت رتن راجیو گاندھی نے اپنی مدت کار کے دوران ملک کو ترقی کی راہ پر ڈالا تھا اور انہوں نے اس ملک کیلئے اپنی جان کی قربانی دی۔ راجیو گاندھی نے اس ملک کی ترقی کیلئے جوکام کیا ہے اسے دنیا جانتی ہے۔

انہوں نے مزید کہا کہ آج ملک میں بی جے پی سے ڈٹ کر مقابلہ کرنے والی واحد پارٹی کانگریس پارٹی ہے۔لہذا تمل ناڈو اور بالخصوص وانمباڑی کے سیکولراور دانش مند شہریوں کو چاہئے کہ وہ سیکولرکانگریس پارٹی کے ہاتھ مضبوط کریں ۔

تقریب کے دروان ریاستی کوآرڈنیٹر اے ایم فرید،ویلور ویسٹ ضلعی چیئرمین الیاس خان، ویلور سینٹرل چیئرمین ای ایم امتیاز احمد ، ضلعی کوآرڈنیٹر سلمان، کوی ارسن ، صلاح الدین ، مدثر پاشاہ،سمیت سینکڑوں پارٹی کارکنان موجود رہے۔