تمل ناڈو کابینہ کی پھر ہوئی توسیع، آئی یو ایم ایل اور وی سی کے لیڈران نے وزارتی عہدہ کا لیا حلف

تمل ناڈو میں وزیر اعلیٰ سی جوزف وجئے کی قیادت والی ٹی وی کے حکومت میں آج ایک بار پھر توسیع کی گئی۔ وزیر اعلیٰ نے اپنی کابینہ میں 2 نئے چہروں کو شامل کیا ہے۔ ان میں انڈین یونین مسلم لیگ (آئی یو ایم ایل) کے لیڈر اے ایم شاہجہاں اور وی سی کے لیڈر وَنّی آراسو شامل ہیں۔ آج صبح دونوں لیڈران نے وزارتی عہدے کا حلف لیا۔

قابل ذکر ہے کہ اے ایم شاہجہاں پاپاناسم اسمبلی حلقہ سے رکن اسمبلی ہیں، جبکہ ونی آراسو ٹنڈیونم اسمبلی حلقہ کی نمائندگی کرتے ہیں۔ ان دونوں لیڈران کی حلف برداری کی تقریب جمعہ کی صبح 9:30 بجے چنئی کے لوک بھون میں منعقد ہوئی۔ وجئے کابینہ کی اس توسیع کو حکومت کی مضبوطی اور اتحادی جماعتوں کے ساتھ بہتر تال میل کی سمت میں ایک بڑا قدم تصور کیا جا رہا ہے۔

اس سے قبل گزشتہ روز بھی وزیر اعلیٰ وجئے نے اپنی کابینہ میں بڑی توسیع کی تھی۔ اس وقت 23 اراکین اسمبلی نے وزارتی عہدے کا حلف لیا تھا۔ اس توسیع میں سب سے زیادہ بحث کانگریس پارٹی کی حکومت میں واپسی کو لے کر ہوئی تھی۔ تقریباً 59 برس کے طویل عرصہ بعد کانگریس تمل ناڈو میں کسی علاقائی جماعت کی حکومت کا حصہ بنی ہے۔

گزشتہ کابینہ فہرست میں ریاست کے تقریباً ہر علاقے کو نمائندگی دی گئی تھی۔ اس میں تھوتھوکُڈی سے سریناتھ، اویناشی سے کمالی ایس اور کانچی پورم سے آر وی رنجیت کمار جیسے لیڈران کو شامل کیا گیا تھا۔ اس کے ساتھ کمبھ کونم، کڈلور اور کوئمبٹور جیسے شہروں کے نمائندوں کو بھی وزیر بنایا گیا تھا۔ اب 2 نئے اتحادی لیڈران کی شمولیت سے حکومت کی کابینہ مزید وسیع ہو گئی ہے۔