یوپی: آئندہ ہفتے ہوگی یوگی آدتیہ ناتھ کی حلف برداری، بی جے پی عظیم الشان تقریب کی تیاریوں میں مصروف

حلف برداری تقریب کے لیے پارٹی مہمانوں کی ایک فہرست تیار کر رہی ہے، مہمانان میں مختلف سرکاری منصوبوں کے مستفیدین شامل ہوں گے جنھیں ’لابھارتھی‘ کہا جاتا ہے۔

یوگی آدتیہ ناتھ / تصویر ٹوئٹر
یوگی آدتیہ ناتھ / تصویر ٹوئٹر
user

قومی آوازبیورو

اتر پردیش انتخاب میں ایک بار پھر اکثریت ملنے کے بعد بی جے پی یوگی آدتیہ ناتھ کی حلف برداری تقریب کو عظیم الشان بنانے کی تیاریوں میں مصروف ہے۔ بحث گرم ہے کہ یوگی آئندہ ہفتے ایکانا اسٹیڈیم میں ایک عظیم الشان تقریب میں وزیر اعلیٰ عہدہ کا حلف لیں گے اور اس تقریب میں کئی وی آئی پی سمیت ہزاروں کی تعداد میں لوگوں کو مدعو کرنے کی تیاری کی جا رہی ہے۔

آفیشیل ذرائع سے موصول ہو رہی خبروں کے مطابق حلف برداری تقریب کے لیے پارٹی مہمانوں کی ایک فہرست تیار کر رہی ہے۔ تقریب کے مہمانوں میں مختلف سرکاری منصوبوں سے فائدہ اٹھانے والے افراد بھی شامل ہوں گے جنھیں ’لابھارتھی‘ (مستفیدین) کہا جاتا ہے۔ انھوں نے ہی بی جے پی کو اقتدار میں واپس لانے میں اہم کردار نبھایا ہے۔


اسٹیڈیم میں تقریباً 200 وی وی آئی پی مہمانوں کے لیے بھی انتظام کیا جا رہا ہے۔ وزیر اعظم نریندر مودی، بی جے پی کے قومی صدر جے پی نڈا، مرکزی وزیر راج ناتھ سنگھ، امت شاہ و دیگر سمیت بی جے پی حکمراں ریاستوں کے وزرائے اعلیٰ اور اپوزیشن سمیت کئی پارٹیوں کے سرکردہ لیڈران کو بھی مدعو کیا جائے گا۔ یوگی آدتیہ ناتھ کی حلف برداری تقریب کی تیاریوں کا جائزہ لے رہے پارٹی افسران نے بتایا کہ تقریب کا انداز اور اس کی عظمت قابل دید ہوگی۔ واضح رہے کہ بی جے پی نے اتر پردیش کی 403 رکنی اسمبلی میں 255 سیٹیں جیت کر لگاتار دوسری بار اقتدار پر قبضہ کیا ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔