سنی دیول لاپتہ! بی جے پی رکن پارلیمنٹ کو تلاش کرنے کے لیے لگے پوسٹر

پٹھان کوٹ ریلوے اسٹیشن پر اداکار اور گرداسپور ایم پی سنی دیول کی گمشدگی کے پوسٹر لگے نظر آ رہے ہیں۔ لوگوں کا الزام ہے کہ لوک سبھا الیکشن ہوئے ایک سال گزر گیا اور وہ ایک بار بھی گرداسپور نہیں آئے۔

تصویر سوشل میڈیا
تصویر سوشل میڈیا
user

قومی آوازبیورو

گرداسپور سے بی جے پی رکن پارلیمنٹ اور بالی ووڈ اداکار سنی دیول لاپتہ ہو گئے ہیں۔ ایسا وہ پوسٹر ظاہر کر رہے ہیں جو پٹھان کوٹ ریلوے اسٹیشن پر چسپاں ہیں۔ دراصل سنی دیول کے گمشدہ ہونے کا پوسٹر گرداسپور کی سڑکوں اور ریلوے اسٹیشنوں پر لگے ہوئے ہیں۔ بتایا جا رہا ہے کہ طویل مدت سے اپنے پارلیمانی حلقہ میں نہ جانے کے سبب لوگوں نے ان کے گمشدہ ہونے کے پوسٹر لگائے ہیں۔ پوسٹر لگائے جانے پر سنی دیول کی جانب سے رد عمل آیا ہے۔

مقامی لوگوں نے سنی دیول پر ناراضگی ظاہر کرتے ہوئے کہا کہ ایک سال پہلے اس امید سے سنی دیول کو الیکشن میں کامیاب کر کے لوک سبھا میں بھیجا گیا تھا کہ وہ ترقی کے لیے کام کریں گے۔ اس کے علاوہ بڑے پروجیکٹ لے کر آئیں گے جس سے بڑھ رہی بے روزگاری کم ہوگی۔ لیکن ہوا یہ کہ سنی دیول نے الیکشن جیتنے کے بعد ایک بھی دورہ نہیں کیا۔

سنی دیول کے لاپتہ والے پوسٹر پر کانگریس لیڈر منیش تیواری نے کہا کہ ’’اس میں کوئی حیران کرنے والی بات نہیں ہے۔ ان کے والد دھرمیندر کے ساتھ بھی بیکانیر میں یہی بات ہوئی تھی۔ گرداسپور کے لوگوں نے ایک مناسب لیڈر کو منتخب کرنے کا موقع گنوا دیا۔ سنیل جاکھڑ پھر سے وہاں سے انتخابی میدان میں اترے تھے۔ اگر وہ منتخب ہوتے تو پارلیمنٹ میں گرداسپور کی آواز پہنچتی۔‘‘

واضح رہے کہ 2019 میں ہوئے لوک سبھا الیکشن میں گرداسپور سیٹ سے بی جے پی کی طرف سے کھڑے ہوئے سنی دیول کو کامیابی ملی تھی۔ لوگوں نے اس امید سے ان کو فتحیاب کیا تھا کہ وہ ریاست کی ترقی کے لیے کام کریں گے، لیکن فی الحال ایسا کچھ بھی نہیں ہوا۔ یہی وجہ ہے کہ لوگ ان سے کافی ناراض ہیں۔