سب انسپکٹر بھرتی گھوٹالہ: سی بی آئی نے مزید 7 افراد کو حراست میں لیا

جموں: سب انسپکٹر بھرتی گوٹالے کیس کی تحقیقات کا دائرہ وسیع کرتے ہوئے سینٹرل بیورو آف انوسٹی گیشن (سی بی آئی ) نے جمعرات کے روز مزید 7افراد کو حراست میں لیا۔

اطلاعات کے مطابق سی بی آئی نے سب انسپکٹر بھرتی گوٹالے میں مبینہ طورپر ملوث سات افراد کی گرفتاری عمل میں لائی۔ ذرائع نے بتایا کہ سی بی آئی نے جموں ، ہریانہ اور پنجاب میں گزشتہ روز چھاپے ڈالے جس دوران اہم کاغذات کو ضبط کیا گیا۔

ذرائع کا کہنا ہے کہ سینٹرل بیورو آ ف انوسٹی گیشن (سی بی آئی )کی ٹیم گرفتار شدگان سے پوچھ تاچھ کر رہی ہیں اور آنے والے دنوں کے دوران اس کیس میں اہم پیش رفتہ کا امکان ہے کیونکہ سروسز سلیکشن بورڈ کے سابق سینئر آفیسران کی بھی گرفتاری متوقع ہے۔

سی بی آئی نے اس سے قبل تیرہ ملزمان کو حراست میں لیا تھا جن میں بی ایس ایف کا سپر انٹنڈنٹ، پولیس اور سی آر پی ایف کے متعدد اہلکار شامل ہیں۔

بتادیں کہ سب انسپکٹر بھرتی میں ہوئی دھاندلیوں کی تحقیقات کی ذمہ داری سی بی آئی کو سونپی گئی ہے۔ سی بی آئی ذرائع کا کہنا ہے کہ سب انسپکٹر امتحانات کے پرچے 20 سے 30 لاکھ روپیہ میں فروخت کئے گئے اور ایسے اُمیدواروں نے ہریانہ کے ایک ہوٹل میں پرچے حل کئے تھے۔