شوٹنگ کے دوران اسٹنٹ مین کی موت، آخری لمحے کا خوفناک ویڈیو وائرل، اداکار وشال غمزدہ

فلمی دنیا سے ایک بُری خبر سامنے آئی ہے۔ جنوبی ہند فلموں کے ڈائرکٹر پا رنجیت اور اداکار آریہ کی آنے والی فلم کے سیٹ پر ناخوشگوار حادثہ پیش آیا ہے۔ کار اسٹنٹ کرتے ہوئے مشہور اسٹنٹ آرٹسٹ راجو (موہن راج) کی جان چلی گئی، جس کا آخری اور خوفناک ویڈیو وائرل ہو رہا ہے۔

جنوبی ہند کے اداکار وشال نے اسٹنٹ مین راجو کی موت کی تصدیق کی ہے۔ انہوں نے سوشل میڈیا پر پوسٹ شیئر کرتے ہوئے اس حادثے پر افسوس کا اظہار کیا ہے۔ دراصل ڈائرکٹر پا۔ رنجیت اس وقت اپنی نئی فلم ’ویٹووم‘ کی شوٹنگ کر رہے تھے۔ اس دوران ناگ پٹینم میں شوٹ کے دوران حادثہ ہو گیا اور اسٹنٹ مین کی جان چلی گئی۔ پہلے خبر ملی تھی کہ انہیں دل کا دورہ پڑا ہے لیکن جیسے ہی اسٹنٹ کا ویڈیو سامنے آیا تو پتہ لگا کہ حادثے میں اسٹنٹ مین کی جان چلی گئی ہے۔

وائرل ویڈیو میں دیکھا جا سکتا ہے کہ اسٹنٹ مین راجو شوٹنگ کے دوران ایس یو وی گاڑی چلا رہے تھے پر جیسے ہی ریمپ سے گاڑی گزری تو زور سے نیچے گر گئی۔ کار کا آگے والا حصہ زمین سے ٹکرا گیا لیکن کچھ دیر بعد سیٹ پر موجود لوگ گاڑی کے پاس بھاگتے ہوئے دکھائی دیے۔

گاڑی کے آگے کا حصہ بھی کافی زور سے زمین سے ٹکرایا تھا۔ پہلے تو ہر کوئی شوٹ ہی کر رہا تھا لیکن کچھ دیر بعد سب اس کی طرف بھاگنے لگے اور انہیں گاڑی سے باہر نکالا گیا۔ یہ وائرل ویڈیو 13 جولائی کا بتایا جا رہا ہے، لیکن حادثے کے دوران اسٹنٹ مین کی موت کی تصدیق اب ہوئی ہے۔

اس افسوسناک حادثے نے پوری فلم انڈسٹری کو ہلا کر رکھ دیا ہے۔ اداکار وشال نے ٹوئٹ کرتے ہوئے لکھا، ’’اس بات پر یقین کرنا بے حد مشکل ہے۔ کار ٹاپلنگ سیکوئنس کرتے ہوئے اسٹنٹ مین راجو کی جان چلی گئی۔ راجو کو کئی سال سے جانتے تھے۔ انہں نے کئی سارے مشکل اسٹنٹ میری فلموں میں پرفارم کیے تھے۔ وہ کافی ہمت والے انسان تھے‘‘۔ وشال نے غمزدہ کنبہ کی مدد کرنے کا بھی وعدہ کیا ہے۔