این سی آر میں تیز ہواؤں سے فضا صاف، کئی علاقوں کا اے کیو آئی اورینج اور یلو زون میں

نوئیڈا: قومی راجدھانی علاقہ این سی آر میں گزشتہ چند دنوں سے چلنے والی تیز ہواؤں کے اثرات اب واضح طور پر فضائی معیار پر نظر آنے لگے ہیں۔ ہوا کی رفتار میں اضافہ ہونے سے آلودہ ذرات منتشر ہوئے ہیں، جس کے نتیجے میں فضائی معیار اشاریہ اے کیو آئی میں نمایاں بہتری درج کی گئی ہے۔

دہلی، نوئیڈا اور غازی آباد کے بیشتر علاقوں میں اے کیو آئی نارنجی (اورینج) اور زرد (یلو) زون میں پہنچ گیا ہے، جو گزشتہ ہفتوں کے مقابلے میں راحت کی علامت سمجھا جا رہا ہے۔ دہلی کے کئی اہم علاقوں میں اے کیو آئی اب بھی نارنجی زون میں برقرار ہے۔ آنند وہار میں اے کیو آئی 289 درج کیا گیا، جب کہ اشوک وہار میں 243 اور بوانا میں 259 ریکارڈ کیا گیا۔ روہنی اور آر کے پورم میں اے کیو آئی 260-260 رہا۔ شادی پور میں 288، وزیرپور میں 254 اور ویویک وہار میں 230 اے کیو آئی درج کیا گیا۔

کچھ علاقوں میں صورت حال نسبتاً بہتر رہی۔ آیانگر میں اے کیو آئی 168، براری کراسنگ میں 124 اور شری اروِندو مارگ پر 129 درج کیا گیا، جو زرد زون کے زمرے میں آتا ہے۔ چاندنی چوک میں اے کیو آئی 193 اور سی آر آر آئی متھرا روڈ پر 189 ریکارڈ کیا گیا۔ نوئیڈا میں بھی فضائی معیار میں بہتری دیکھی گئی۔ سیکٹر 125 میں اے کیو آئی 237، سیکٹر 62 میں 154، سیکٹر 1 میں 192 اور سیکٹر 116 میں 195 درج کیا گیا۔

غازی آباد میں بھی حالات پہلے کے مقابلے بہتر ہوئے ہیں۔ اندراپورم میں اے کیو آئی 202 اور وسندھرا میں 229 ریکارڈ کیا گیا، تاہم لونی میں اے کیو آئی 295 درج کیا گیا جو نسبتاً زیادہ ہے۔

محکمہ موسمیات کے مطابق آنے والے دنوں میں درجہ حرارت میں تبدیلی متوقع ہے۔ 9 فروری کو زیادہ سے زیادہ درجہ حرارت 24 اور کم سے کم 9 ڈگری سیلسیس رہا، جب کہ ہلکی دھند بھی چھائی رہی۔ 10 اور 11 فروری کو زیادہ سے زیادہ درجہ حرارت 25 ڈگری سیلسیس تک پہنچنے اور کم سے کم درجہ حرارت میں بتدریج اضافے کا امکان ہے۔ ماہرین کا کہنا ہے کہ اگر ہوا کی رفتار برقرار رہی تو فضائی معیار میں مزید بہتری ممکن ہے۔