دلت احتجاج: امبیڈکر کے پوتے نے مہاراشٹر بند کو واپس لیا

میڈیا رپورٹوں کے مطابق ڈاکٹر بھیم راؤ امبیڈکر کے پوتے اور سماجی کارکن پرکاش امبیڈکر نے بند کی کال کو واپس لے لیا۔

بہوجن مہاسنگھ (بی بی ایم)کے رہنماء پرکاش امبیڈکر نے حکومت کی ناکامی کے خلاف بند کا اعلان کیا اورتشدد بھڑکانے کے لیے ہندوایکتا اگاڑی کو موردالزام ٹھہرایا ہے۔

انہوں نے دعویٰ کیا کہ بند کامیاب رہا اور اس بند کو مہاراشٹر ڈیموکرٹیک فرنٹ، مہاراشٹر کے بایاں محاذ سمیت 250 تنظیموں نے حمایت کی ہے۔

باباصاحب امبیڈکرکے پوتے پرکاش امبیڈکر نے پُرامن بند کی اپیل کرتے ہوئے بھیما کورے گاؤں میں مراٹھااور دلتوں کے درمیان اختلاف سے انکار کیا ہے۔ انہوں نے کہا کہ گزشتہ روز کا پروگرام سمبھا جی بریگیڈ نے منعقد کیا تھا۔ دوسوسالہ فتح کے جشن سے کوئی کشیدگی نہیں پیدا ہوئی تھی۔

چیمبور میں اسکول بسوں کو بھی نقصان پہنچایا گیا۔ بند کی وجہ سے اولاَ اور اوبَیر ٹیکسی کی بھی خدمات متاثر ہوئیں۔ بیسٹ نے سیکورٹی کی وجہ سے کئی مقامات پر بسوں کی سروس بند رکھی۔ ممبئی سے پونے اور کرناٹک کی طرف جانے والی بسوں کو سیکورٹی کی وجہ سے اگلے حکم تک روک دیا گیا ہے۔

اجنتا اور ایلورا غاروں کو دیکھنے کے لئے آنے والے سیاح پھنس گئے ہیں۔ ان میں بیشتر سیاح جاپان کے ہیں۔ تمام دکانوں، اسکولوں اور تجارتی اداروں کو احتیا ط کے طور پر بند کردیا گیا ہے۔

ملک کی اقتصادی راجدھانی ممبئی کی لائف لائن لوکل ٹرین ورار، ملاڈ، گورےگاؤں اور تھانے میں کچھ وقت کے لئے روک دیی گئی جس سے لوگوں کو کافی پریشانی ہوئی۔ ممبئی کے دفاتر میں لاکھوں لوگوں کو کھانا پہنچانے والے ’ڈبہ والے‘ نے آج اپنی خدمات بند رکھیں۔ ممبئی میونسپل کارپوریشن کے افسران کے مطابق دلت ملازمین نے بیسٹ کی تیرہ بسوں کو باندرہ کے کلانگر، دھاراوی، کام راج نگر، گورےگاؤں، سنتوش نگر، ملاڈ کے ڈنڈوسی اور کاندی ولی کے ہنومان نگر میں روک کر نقصان پہونچایا۔

مہاراشٹر بند کا اثر اب گجرات میں بھی ظاہر ہونے لگا ہے۔ گجرات کے واپی میں دلت سینا نے ہائی وے جام کر دیا۔ بیچ سڑک پر مظاہرین نے ٹائر نذر آتش کر کے احتجاج کیا۔

مہاراشٹر کے مدے پر لوک سبھا میں ہنگامہ کے بعد اسپیکر سمترا مہاجن نے لوک سبھا کی کارروائی معطل کر دی ۔ لوک سبھا کی کارروائی 12.45پر دوبارہ شروع ہو گی

لوک سبھا میں کانگریس رہنما ملیکاارجن کھڑگے نے مہاراشٹر کے حالیہ تشدد کے لئے سخت گیر ہندو تنظیم آر ایس ایس کو ذمہ دار قرار دیا

مہارشٹر میں دلتوں کے احتجاج کا اثر اب قومی راجدھانی دہلی میں بھی دکھائی دینے لگا ہے۔ دہلی میں واقع مہاراشٹر سدن کی سکیورٹی میں اضافہ کیا گیا ہے اور پولس اور انتظامیہ کسی بھی صورت حال سے نمٹنے کے لئے مستعد ہے۔

مہاراشٹر کے حالات پر پارلیمنٹ میں ہنگامہ۔ حزب اختلاف نے دلتوں کے معاملہ پر حکومت کے خلاف ہنگامہ کیا

پونے کی تحصیل شرور میں دلتوں کی تقریب میں تشدد کے بعد مہاراشٹر کے کئی علاقوں میں تشدد بھڑک اٹھا۔ تشدد بھڑکنے کے بعد دلتوں کی کئی تنظیموں نے پورے مہاراشٹر میں بند کا اعلان کر دیا تھا۔ آج بند کے دوران عام زندگی متاثر ہے۔ کئی مقامات پر بس سروس پوری طرح متاثر نظر آ رہی ہیں۔

یو این آئی آؤٹ پٹ کے ساتھ