میزورم میں پتھر کی کان دھنسنے کا واقعہ، 8 مزدوروں کی لاشیں برآمد، 4 کی تلاش جاری، تمام کا تعلق بہار سے

آئیزول: میزورم میں پیر کے روز پتھر کی ایک کان دھنس گئی اور 12 مزدور پھنس گیے۔ اب تک 8 کی لاشیں برآمد کی جا چکی ہیں۔ تہن افراد کے بدن کے ٹکڑے برآمد ہوئے ہیں۔ بتایا جا رہا ہے کہ تمام مزدور بہار کے رہائشی ہیں۔ ایس ڈی آر ایف، بی ایس ایف اور آسام رائفلز کی ٹیمیں موقع پر راحت اور بچاؤ میں مصروف ہیں۔ تاحال لاشوں کی شناخت ممکن نہیں ہو پائی ہے۔

بتایا جا رہا ہے کہ یہ پتھر کی ایک بڑی کان ہے، جہاں کان کنی میں مصروف 12 مزدور پھنس گئے۔ حادثہ ہنٹھیال ضلع میں پیش آیا۔ اچانک حادثے کی وجہ سے وہاں موجود کارکنوں کو بھاگنے کا موقع بھی نہیں ملا۔ اطلاع ملتے ہی آس پاس کے دیہات کے لوگ پہنچ گئے اور پھنسے ہوئے لوگوں کو نکالنے کی کوششیں شروع کر دیں۔

اس کان کا ٹھیکہ اے بی سی آئی انفراسٹرکچر پرائیویٹ لمیٹڈ کے ساتھ ہے اور یہاں پچھلے ڈھائی سال سے کان کنی کا کام جاری تھا۔ آخری اطلاع موصول ہونے تک مقامی انتظامیہ بھی موقع پر موجود تھی اور مزدوروں کو کان سے نکالنے کی کوششیں جاری تھیں۔