سری لنکا نے 41 ہندوستانی ماہی گیروں کو رہا کر دیا، وطن واپس لوٹے

چنئی: سری لنکا نے 41 ہندوستانی ماہی گیروں کو رہا کر دیا ہے۔ یہ ماہی گیر ستمبر 2024 میں بین الاقوامی سمندری سرحدی لائن (آئی ایم بی ایل) عبور کرنے کے الزام میں گرفتار کیے گئے تھے۔ بدھ کے روز حکام نے اطلاع دی کہ یہ مچھیریں چنئی ہوائی اڈے پر پہنچ چکے ہیں۔

رہائی کے بعد منگل کی رات دیر گئے ماہی گیروں کی واپسی ہوئی۔ تمل ناڈو ساحلی پولیس کے مطابق ان میں سے 35 ماہی گیروں رام ناتھ پورم سے تعلق رکھتے ہیں جبکہ باقی ناگ پٹنم اور پڈوکوٹئی اضلاع کے رہائشی ہیں۔ چنئی پہنچنے پر انہیں شہری شناخت کی جانچ، کسٹم کارروائیوں اور دیگر رسمی مراحل سے گزرنا پڑا۔

تمل ناڈو ماہی گیری محکمہ نے ماہی گیروں کا استقبال کیا اور انہیں ان کے گھروں تک لے جانے کا بندوبست کیا۔ اس سے قبل سری لنکا نے 15 ماہی گیروں کے ایک اور گروپ کو رہا کیا تھا جو 16 جنوری کو ہندوستان واپس پہنچے تھے۔

ہندوستانی ماہی گیروں کی گرفتاری کا معاملہ ایک دیرینہ مسئلہ بن چکا ہے۔ وزیر خارجہ ایس جے شنکر نے حالیہ ملاقات میں سری لنکا کے صدر انورا دیسانائیکے سے اس موضوع پر گفتگو کی تھی۔ اسی دوران تمل ناڈو کے وزیراعلیٰ ایم کے اسٹالن نے بھی مرکز سے درخواست کی کہ ماہی گیروں کی مسلسل گرفتاری کو روکا جائے اور ان کی سلامتی کو یقینی بنایا جائے۔

تمل ناڈو کے ماہی گیروں کی تنظیموں نے ساحلی علاقوں میں بڑے مظاہرے کیے اور فیصلہ کن اقدامات کا مطالبہ کیا۔ انہوں نے وزیراعظم نریندر مودی کو خط لکھ کر سمندر میں ہونے والی گرفتاریوں اور مچھلی پکڑنے والی کشتیوں کی ضبطی پر پابندی لگانے کی اپیل کی، جو ان کے روزگار کا ذریعہ ہیں۔

پی ایم کے کے صدر اور سابق مرکزی وزیر انبومنی رام داس نے بھی سخت اقدامات کے لیے حکومت سے مطالبہ کیا کہ وہ ماہی گیروں کی مزید گرفتاریوں کو روکیں۔ موجودہ حالات کے مطابق، تمل ناڈو کے 504 ماہی گیروں اور 48 کشتیوں کو سری لنکا کی تحویل میں بتایا گیا ہے، جس سے یہ مسئلہ مزید سنگین ہوتا جا رہا ہے۔