یو پی اسمبلی کا خصوصی اجلاس 2 اکتوبر سے

لکھنؤ: مہاتما گاندھی کی 150 ویں جینتی کو تاریخی بنانے کے لئے اترپردیش حکومت نے آل پارٹی میٹنگ میں پیش کی گئی دونوں اسمبلیوں کے خصوسی اجلاس بلائے جانے کی تجویز پر اپنی مہر ثبت کردی ہے۔

خصوصی اجلاس کا آغاز دو اکتوبر کو دن کے گیارہ بجے سے ہوگا۔ اجلاس دونوں اسمبلیوں علیحدہ علیحدہ طور پر چلے گا اور تین اکتوبر کی دیر رات تک جاری رہے گا۔اس سے قبل حکومت نے اس مناسبت سے بغیر کسی انقطاع کے 48 گھنٹوں کے اسپیشل سیشن بلائے جانے کا اعلان کیا تھا۔

ریاستی حکومت کے ترجمان سری کانت شرما نے منگل کو بتایا کہ ریاستی کابینہ نے خصوصی سیشن کی تجویز پر اپنی مہر ثبت کردی ہے۔انہوں نے بتایا کہ اس خصوصی اجلاس میں مہاتما گاندھی کے نظریات اور پالیسیوں پر تبادلہ خیال کیا جائے گا اس کے علاوہ دونوں ایوانوں میں پائیدار ترقی کے اہداف کے لئے اقوام متحدہ کے 17 نکاتی چارٹر پر ڈبیٹ ہوگا ۔ان قراردادوں پر حکومت ہند نے سال 2015 میں دستخط کئے تھے۔

خصوصی اجلاس کے دوران دونوں ایوانوں میں ہر ممبر کو اپنے متعلقہ حلقے کی ترقی کے حوالے سے بولنے کا موقع دیا جائےگا۔اراکین کو خصوصی اجلاس میں اپنے خیالات رکھنے اور اپنے حلقے کے مسائل بیان کرنے کا موقع دیا جائے گا۔گذشتہ مہینے آل پارٹی میٹنگ میں بابائے قوم مہاتما گاندھی کی 150 ویں جینتی کے موقع پر خصوصی اجلاس کو بلائے جانے کا فیصلہ کیا گیا تھا۔

قابل ذکر ہے کہ اقوام متحدہ کے اہداف میں غربت کا خاتمہ، صنفی عدم مساوات کا خاتمہ،غذائیت،صحت،توانائی،تعلیم،پینے کا صاف پانی، جنسی مساوات وغیرہ جیسے اہم نکات کو ترجیح حاصل ہے۔