کورونا کے سبب 21 جون کو کروکشیتر میں نہیں لگے گا ’سورج گہن میلہ‘

کورونا وبا کی وجہ سے اس سال 21 جون یعنی اتوار کے دن پڑنے والے سورج گہن کے موقع پر کروکشیتر کے برھم سروور گھاٹ پر کسی پروگرام کا انعقاد نہیں ہو رہا ہے۔ لوگوں سے اپیل کی گئی ہے کہ وہ اس سال اماوسیا اور سورج گہن کے وقت پوجا کے لیے برھم سروور گھاٹ پہنچنے کی جگہ اپنے گھر پر ہی رہیں اور پوجا کریں۔

ہریانہ حکومت کے ترجمان نے بتایا کہ ہندوستان میں 21 جون کو سورج گہن کا وقت صبح 10.20 بجے سے لے کر دوپہر 1.47 بجے تک رہے گا۔ لیکن حکومت نے اس سال کورونا وائرس کی وجہ سے سورج گہن میلہ پر کروکشتر میں کوئی اجتماعی تقریب منعقد نہ کرنے کا فیصلہ لیا ہے۔ ضلع مجسٹریٹ کے ذریعہ 19 سے 21 جون تک برھم سروور، سنیہت سروور کے ایک کلو میٹر کے علاقہ میں قانون اور نظام امن بنائے رکھنے کے لیے فوری اثر سے دفعہ 144 نافذ کرنے کا حکم جاری کیا گیا ہے۔ 19 جون کو رات 9 بجے سے لے کر 21 جون کو شام 4 بجے تک یہ کرفیو رہے گا۔

قابل ذکر ہے کہ سورج گہن کے موقع پر ملک و بیرون ملک سے بڑی تعداد میں عقیدت مند پتری دان اور غسل کرنے کے لیے کروکشیتر کے برھم سروور پہنچتے ہیں۔ حکومت کے ترجمان نے بتایا کہ اس سلسلے میں پنجاب، ہماچل پردیش، دہلی، اتر پردیش اور مرکز کے ماتحت علاقہ چنڈی گڑھ کو مطلع کر دیا گیا ہے۔ نئی دہلی میں واقع مختلف ممالک کے سفارتخانوں کے سفیروں کو بھی ریاستی حکومت کے اس فیصلہ سے مطلع کرانے کے لیے کہا گیا ہے۔