متھرا میں زبردست سڑک حادثہ، ایک ہی خاندان کے 6 افراد ہلاک

اترپردیش کے ضلع متھرا کے بلدیو علاقے میں اتوار کو یمنا ایکسپریس وے پر کار اور ٹرک کی ٹکر میں چھ افراد کی موت ہوگئی جبکہ دیگر دو شدید طور سے زخمی ہوگئے۔

تصویری سوشل میڈیا
تصویری سوشل میڈیا

قومی آوازبیورو

متھرا: اترپردیش کے ضلع متھرا کے بلدیو علاقے میں اتوار کو یمنا ایکسپریس وے پر کار اور ٹرک کی ٹکر میں چھ افراد کی موت ہوگئی جبکہ دیگر دو شدید طور سے زخمی ہوگئے۔

سپرنٹنڈنٹ آف پولس آدتیہ کمار شکلا نے بتایا کہ سنگ میل نمبر 140 اور 141 کے درمیان صبح تقریباً ساڑھے آٹھ بجے یہ حادثہ اس وقت پیش آیا جب بلند شہر سے آگرہ کی جانب جا رہی کار سامنے سے آرہے ٹرک سے ٹکرا گئی۔

اس حادثے میں چار خواتین اور ایک مرد سمیت پانچ افراد کی موت موقع پر ہی ہو گئی جبکہ دیگر تین شدید طور سے زخمی ہوگئے۔ بعد ازاں علاج کے لئے لے جاتے وقت ایک اور شخص کی موت ہو گئی۔ بقیہ دو زخمیوں کو آگرہ کے ایک پرائیویٹ اسپتال میں علاج کے لئے داخل کرایا گیا ہے جہاں ان کی حالت بھی کافی نازک ہے۔ ٹکر اتنی شدید تھی کہ کار کو کاٹ کر ٹرک سے الگ کیا گیا۔ سبھی مہلوک اور زخمی آگرہ گھومنے جا رہے تھے۔ مرنے والوں کی شناخت کی کوشش کی جارہی ہے۔

انہوں نے کہا کہ ’’نوئیڈا سے آگرہ کی طرف جا رہی کار آگے چل رہے ٹرک میں پیچھے سے جا گھسی۔ ٹکر اتنی زبردست تھی کہ کار کے پرخچے اڑ گئے۔ ٹرک ڈرائیور ٹرک کو لے کر فوراً فرار ہو گیا۔‘‘

وہیں اس حادثے پر ریاست کے وزیر اعلی یوگی آدتیہ ناتھ نے اپنے دکھ کا اظہار کرتے ہوئے متأثرین کے اہل خانہ کے تئیں اپنی ہمدردی کا اظہار کیا ہے۔ انہوں نے زخمیوں کے جلد صحت یابی کی آرزو کرتے ہوئے ڈسٹرکٹ مجسٹریٹ کو حکم دیا ہے کہ متاثرین کو مناسب تعاون فراہم کیا جائے۔