بہار میں نتیش-بی جے پی حکومت میں نوجوانوں کی حالت قابل رحم: تیجسوی

پٹنہ: بہار اسمبلی میں اپوزیشن لیڈر تیجسوی پرساد یادو نے ریاست میں گروپ ڈی (چوتھے زمرے) کی اسامیوں کے لئے سب سے زیادہ ایم بی اے، ایم سی اے اور بی ٹیک امیدواروں کی درخواست کے سلسلے میں وزیر اعلی نتیش کمار کو نشانہ بنایا ہے۔ تیجسوی یادو نے آج کہا کہ ریاست میں گزشتہ 15 سال میں نتیش اور بھارتیہ جنتا پارٹی (بی جے پی) کی حکومت میں نوجوانوں کی حالت قابل رحم ہوگئی ہے۔

تیجسوی یادو نے ٹوئٹر پر بتایا کہ "15 سال کی نتیش-بی جے پی حکومت میں بہار میں نوجوانوں کی حالت قابل رحم ہوگئی ہے۔ گروپ ڈی (چوتھے زمرے) کی 186 اسامیوں جن میں چپراسی، مالی اور صفائی کرنے والے ملازمین کے لئے پانچ لاکھ سے زیادہ لوگوں نے درخواست دی ہے۔ ان میں زیادہ تر ایم بی اے (ماسٹر آف بزنس ایڈمنسٹریشن)، ایم سی اے (ماسٹر آف کمپیوٹر اپلی کیشن)، ایم- کام (کامرس میں ماسٹرز) اور بی ٹیک کے طلبا ہیں۔

واضح رہے کہ بہار اسمبلی میں گروپ ڈی کے لئے 186 پوسٹوں کو پر کرنے کے لئے پانچ لاکھ سے زیادہ امیدواروں نے درخواست دی ہے۔ اس کے لئے 04 ستمبر سے ہی اسمبلی احاطے میں انٹرویو چل رہا ہے اور ابھی تک تقریباً چار لاکھ سے زیادہ طالب علموں نے انٹرویو دے دیئے ہیں جبکہ باقی درخواست دہندگان کے لئے انٹرویو کا عمل جاری ہے۔