ہریانہ میں سامنے آیا حیرت انگیز واقعہ، 12 برس کی عمر میں لگی گولی 32 سال بعد بھی جسم میں موجود

ہریانہ کے فرید آباد کی ڈبوا کالونی میں ایک چونکا دینے والا معاملہ سامنے آیا ہے جہاں 32 سال کی کویتا کو کبھی یہ احساس تک نہیں ہوا کہ 12 سال کی عمر سے وہ جسم کے اندر ایس ایل آر کی گولی لے کر گھوم رہی ہے۔ خبر کے مطابق دو مہینے پہلے کویتا کو اپنی ران میں ایک پھوڑا بڑھتا ہوا محسوس ہوا۔ شروع میں گھریلو علاج سے کوئی فائدہ نہیں ہوا لیکن جب پھوڑا پھوٹ گیا تو اس میں سے ایک گولی باہرنکلی۔ اس واقعے سے پورا خاندان حیران رہ گیا، کیونکہ یہ گولی ایس ایل آر رائفل کی تھی اور ڈاکٹروں نے بھی اس کی شناخت بھی کی ہے۔

پوچھے جانے پر کویتا نے بتایا کہ جب وہ 12 سال کی تھی تو آرمی کیمپ کے قریب اسکول کے میدان میں امتحان کا پیپر دینے کے دوران اس کے جسم کے نچلے حصے میں کو نُکیلی چیز آکر لگی تھی۔ اس وقت وہ سمجھ نہیں پائی کہ یہ گولی ہوسکتی ہے۔ ٹیچر نے اسے معمولی چوٹ کہہ کر اسے گھر بھیج دیا تھا۔ اس وقت اہل خٓانہ نے گھر پر ہی زخم پر تیل اور ہلدی کا پیسٹ لگایا تھا۔ کچھ وقت بعد زخم ٹھیک ہو گیا تھا۔ 20 سال تک انہیں کبھی کوئی پریشانی نہیں ہوئی۔

اس معاملے میں ڈاکٹروں کا کہنا ہے کہ گولی جسم کے اندر رہ سکتی ہے، خاص طور پر جب اس کی رفتار کم ہوتی ہے۔ گولی کے آس پاس خلیے ایک دیوار کی طرح بن جاتے ہیں، جو اسے جسم کے باقی حصے کو نقصان نہیں پہنچانے دیتے۔ وقت گزرنے کے ساتھ یہ دیوار ٹوٹ سکتی ہے، جس سے گولی باہر آسکتی ہے، جیسا کہ کویتا کے معاملے میں ہوا ہے۔

کویتا کے شوہر پردیپ نے کہا کہ حیرت کی بات ہے کہ اتنے سالوں بعد گولی نکلی۔ اس سے پہلے نہ کبھی درد ہوا تھا اور نہ ہی اس کا پتہ چلا۔ گولی بغیر کسی آپریشن کے خود ہی باہر آ گئی۔ ڈاکٹروں نے بتایا کہ کویتا اب بالکل ٹھیک ہے۔ کویتا نے کہا کہ اب وہ گولی کو سنبھال کر رکھیں گی، کیونکہ لوگ اسے دیکھنے کے لیے ان کے پاس آ رہے ہیں۔