کانگریس کے سینئر رہنما اور سابق مرکزی وزیر سریش کلماڑی کا انتقال، 81 سال کی عمر میں لی آخری سانس

پونے: کانگریس کے سینئر رہنما، سابق مرکزی وزیر اور ہندوستانی اولمپک ایسوسی ایشن کے سابق صدر سریش کلماڑی کا منگل کے روز 81 برس کی عمر میں انتقال ہو گیا۔ ان کے انتقال کی خبر سامنے آتے ہی سیاسی، سماجی اور کھیلوں کے حلقوں میں غم کی لہر دوڑ گئی۔ کانگریس پارٹی کے لیے یہ ایک ایسے رہنما کا نقصان ہے جس نے دہائیوں تک نہ صرف پونے بلکہ قومی سیاست اور کھیلوں کے شعبے میں بھی نمایاں کردار ادا کیا۔

خاندانی ذرائع کے مطابق سریش کلماڑی کا جسد خاکی دوپہر دو بجے تک پونے میں واقع ان کی رہائش گاہ پر آخری دیدار کے لیے رکھا جائے گا، جب کہ شام ساڑھے تین بجے ویکنٹھ شمشان بھومی میں سرکاری اعزاز کے ساتھ آخری رسومات ادا کی جائیں گی۔ ان کے انتقال پر کانگریس قیادت کے علاوہ مختلف سیاسی جماعتوں، کھیلوں سے وابستہ شخصیات اور سماجی تنظیموں نے گہرے رنج و غم کا اظہار کیا ہے۔

سریش کلماڑی کو پونے کی سیاست میں ایک بااثر اور فیصلہ کن شخصیت کے طور پر جانا جاتا تھا۔ سیاست میں آنے سے قبل انہوں نے ہندوستانی فضائیہ میں پائلٹ کے طور پر ملک کی خدمت کی۔ بعد ازاں انہوں نے سیاست کا رخ کیا اور متعدد مرتبہ پونے سے لوک سبھا کے رکن منتخب ہوئے۔ مرکزی حکومت میں وزیر کی حیثیت سے بھی انہوں نے اپنی ذمہ داریاں انجام دیں اور شہری ترقی، بنیادی ڈھانچے اور عوامی بہبود سے متعلق کئی منصوبوں میں سرگرم کردار ادا کیا۔

کھیلوں کے میدان میں بھی سریش کلماڑی کی شناخت نمایاں رہی۔ ہندوستانی اولمپک ایسوسی ایشن کے صدر کی حیثیت سے انہوں نے طویل عرصے تک کھیلوں کی انتظامیہ کی قیادت کی۔ دو ہزار دس میں دہلی میں منعقدہ کامن ویلتھ گیمز ان کے کیریئر کا ایک اہم مرحلہ ثابت ہوئے۔ اگرچہ ان کھیلوں سے جڑے تنازعات نے ان کی شبیہ کو متاثر کیا، تاہم بین الاقوامی سطح پر بڑے کھیلوں کے انعقاد اور ہندوستانی کھیلوں کو عالمی پہچان دلانے کی کوششوں میں ان کا کردار نظر انداز نہیں کیا جا سکتا۔

اس کے علاوہ پونے فیسٹیول اور پونے انٹرنیشنل میراتھن جیسے پروگراموں کے ذریعے انہوں نے شہر کو ثقافتی اور کھیلوں کے مرکز کے طور پر فروغ دیا۔ ان سرگرمیوں نے پونے کو قومی ہی نہیں بلکہ عالمی سطح پر بھی ایک الگ شناخت عطا کی۔ سریش کلماڑی کے انتقال سے کانگریس، پونے کی سیاست اور ہندوستانی کھیلوں کے منظرنامے کو ایک ناقابلِ تلافی نقصان پہنچا ہے۔