دہلی کے بھجن پورہ میں ایمیزون کے سینئر مینیجر کا گولی مار کر قتل

نئی دہلی: دہلی کے بھجن پورہ علاقے میں نامعلوم حملہ آوروں نے ایمیزون کے ایک سینئر مینیجر کو گولی مار کر ہلاک کر دیا۔ ایک اہلکار نے بدھ کو بتایا کہ فائرنگ میں ایک اور شخص زخمی بھی ہوا ہے۔ حکام نے بتایا کہ ہلاک ہونے والے شخص کی شناخت ہرپریت گل کے طور پر کی گئی ہے اور زخمی گووند سنگھ (32) اسپتال میں زیر علاج ہے۔

پولیس کے مطابق، یہ واقعہ بھجن پورہ کے سبھاش وہار میں منگل کی رات تقریباً 11:37 بجے پیش آیا اور 11:53 بجے پولیس کنٹرول روم پر کال کی گئی۔ موقع پر پہنچنے پر معلوم ہوا کہ ہرپریت اور گووند اپنی اسپلنڈر بائک پر گلی نمبر 8 کے قریب جا رہے تھے کہ اسکوٹی اور بائک پر سوار 5 لوگوں نے انہیں روک لیا۔

ایک سینئر پولیس افسر نے بتایا کہ حملہ آوروں نے بغیر اشتعال کے فائرنگ کی اور موقع سے فرار ہو گئے۔ ایمیزون میں سینئر مینیجر کے طور پر کام کرنے والے ہرپریت کے سر میں گولی لگی اور اسے جگ پرویش چندر ہسپتال میں مردہ قرار دے دیا گیا۔ عہدیدار نے کہا ’’گووند کو بھی گولی لگی ہے اور اسے مزید علاج کے لیے ایل این جے پی اسپتال ریفر کیا گیا ہے۔‘‘

عہدیدار نے بتایا کہ مجرموں کی شناخت اور ان کو پکڑنے کے لیے علاقے میں سی سی ٹی وی کی جانچ کی جا رہی ہے۔ عہدیدار نے کہا ’’فائرنگ کے واقعے کے پیچھے محرکات کا پتہ لگایا جا رہا ہے۔ قتل کا مقدمہ درج کر لیا گیا ہے۔‘‘