سیما حیدر اور سچن کی طبیعت بگڑی، بات کرنے میں بھی ہو رہی دقت، ڈاکٹر گھر پر ہی کر رہے علاج

پاکستانی خاتون سیما حیدر کی اچانک طبیعت خراب ہو گئی ہے۔ وہ کسی سے بات بھی نہیں کر پا رہی ہے اور ڈاکٹر نے گھر پر ہی اس کا علاج شروع کر دیا ہے۔ سیما حیدر کے شوہر سچن کی بھی طبیعت بگڑنے کی خبریں موصول ہو رہی ہیں اور سیما و سچن دونوں کو ہی ڈاکٹر نے گھر پر ہی ڈرِپ لگا دیا ہے اور علاج جاری ہے۔

میڈیا رپورٹس کے مطابق سچن مینا کے والد سچن نیترپال نے بتایا کہ جمعہ کی شب سے ہی سیما کی طبیعت خراب ہے جو کہ ہفتہ کی صبح مزید خراب ہو گئی۔ وہ بہت کمزوری محسوس کر رہی ہے اور ٹھیک سے بات نہیں کر پا رہی۔ گھر سے نکلے ڈاکٹر نے بھی میڈیا کو جانکاری دی کہ وہ سیما کو ڈرِپ لگا کر آئے ہیں اور ان کا علاج کیا جا رہا ہے۔

واضح رہے کہ حال ہی میں پاکستانی خاتون کے جاسوس ہونے کا شبہ اور پاکستان سے ہندوستان آنے کی صحیح وجہ جاننے کے لیے اتر پردیش اے ٹی ایس اور دیگر جانچ ایجنسیوں نے دو دن تک سیما سے پوچھ تاچھ کی تھی۔ پاکستانی خاتون کے علاوہ سچن مینا اور اس کے والد نیترپال سے بھی اے ٹی ایس نے کئی گھنٹے تک پوچھ تاچھ کی تھی۔ بعد ازاں جمعرات کو سبھی گریٹر نوئیڈا کے ربوپورا واقع گھر واپس آ گئے تھے۔

قابل ذکر ہے کہ سیما کو پولیس سیکورٹی کے درمیان جمعہ کو میڈیا سے بات چیت کی اجازت دے دی گئی۔ جمعہ کے روز دن بھر سچن کے گھر پر ہلچل رہی۔ سیما نے میڈیا والوں کو بتایا کہ اے ٹی ایس نے اس سے پیدائش سے لے کر اب تک کے ہر طرح کے سوال پوچھے جس کا صحیح جواب اس نے دیئے۔ سیما نے یہ بھی بتایا کہ پاکستانی فوج میں صوبیدار بتائے جا رہے چچا سے اس کا کبھی کوئی لینا دینا نہیں رہا۔ اس نے نیپال ہوٹل منیجر اور ٹکٹ بک کرنے والے بس ایجنٹ کے دعویٰ کو بھی جھوٹ پر مبنی قرار دیا ہے۔