مدارس سے فارغ علماء و حفاظ دین و دنیا کا سب سے بڑا سرمایہ: مولانا شبیر

مولانا مظاہری نے مدارس سے فارغ طلبہ کو مبارکباد پیش کرتے ہوئے کہا کہ اب آپ لوگ ایک نئی زندگی کی شروعات کرنے جا رہے ہیں۔ چونکہ آپ لوگ قوم کا سرمایہ ہیں، اس لئے معاشرے کے لئے اہم کردار ادا کریں۔

تصویر سوشل میڈیا
تصویر سوشل میڈیا
user

یو این آئی

پرتاپ گڑھ: قرآن کی دولت سے مالا مال حفاظ و عالم دین سب سے بڑا سرمایہ ہیں۔ قرآن کے حافظ کا بہت بڑا مرتبہ و اللہ کے نزدیک بہت محبوب ہوتا ہے۔ جمعیتہ علماء ہند اتر پردیش کے سکریٹری مولانا شبیر احمد مظاہری یہاں بطور مہمان خصوصی مدرسہ قرآنیہ تنویر العلوم دارا پور کے سالانا دستار بندی اجلاس کو خطاب کرتے ہوئے مذکورہ تاثرات کا اظہار کیا۔

مولانا مظاہری نے کہا کہ مدارس دین کے قلعے ہیں، جن کا ملک کی آزادی سے لے کر ملک کی ترقی میں اہم کردار ہے۔ انہوں نے کہا کہ موجودہ حکومت کی ان دینی مدارس پر اب نظر ہے وہ یہاں عصری تعلیم کے نام پر اپنے نظریہ کا نصاب نافظ کرنے میں کوشاں ہے۔ جبکہ زیادہ تر مدارس میں دین کے ساتھ عصری تعلیم کا نظم ہے۔ اللہ تعالی مغرور لوگوں کے غرور کو توڑ دیتا ہے۔ آج ملک جس پرآشوب دور سے گزر رہا ہے، جس سے لوگ بخوبی واقف ہیں۔


اللہ تعالی کی ذات پر بھروسہ کرکے استقامت و مضبوطی کے ساتھ دین اسلام کی راہ پر گامزن رہیں۔ اللہ تعالی حق کی پیروی کرنے والوں کے ساتھ ہے۔ قرآنی تعلیمات کو اپنی زندگی کا حصہ بنائیں اور حلال و حرام کے فرق کو سمجھیں۔ انہوں نے مدارس سے فارغ ہونے والے طلبہ کو مبارکباد پیش کرتے ہوئے کہا کہ اب آپ لوگ ایک نئی زندگی کی شرعات کرنے جا رہے ہیں۔ چونکہ آپ لوگ قوم کا سرمایہ ہیں، اس لئے معاشرے کے لئے اہم کردار ادا کریں۔

قاری سید حبیب احمد باندوی نے فارغین طلبہ کی دستار بندی کرتے ہوئے اپنے صدارتی خطاب میں فرمایا یہاں فارغ ہونے والے طلبہ پر معاشرے کی بہت بڑی ذمہ داری ہے۔ وہ یہاں سے جا کر معاشرہ کو دین سے آراستہ کرنے کا کام کریں۔ قرآنی تعلیمات کو اپنی اپنی زندگی کا اہم جزو بنائیں اور اس پر عمل کرنے پر مزید ترجیح دیں۔ انہوں نے والدین و اساتذہ کو مبارکباد دیتے ہوئے ان کی ذمہ داریوں کا احساس دلایا جبکہ جلسے کو مدارس کے اساتذہ وغیرہ نے بھی خطاب کیا۔ اس موقع پر فارغین طلبہ کی دستار بندی کی گئی۔جبکہ قرب و جوار سے کثیر تعداد میں لوگوں نے شرکت کی۔ جلسہ کی نظامت کے فرائض حافظ فروز احمد مدنی نے انجام دیئے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔