بہار میں بی جے پی لیڈر کے قتل کے بعد نشانے پر آئے سمراٹ چودھری، آر جے ڈی نے کہا ’عوام بھگوان بھروسے‘

بہار میں نئی حکومت آنے کے بعد ایک بار پھرلاء اینڈ آرڈر کا معاملہ سرخیوں میں آگیا ہے۔ بدھ کے روز ایک پروگرام کے دوران جہاں نائب وزیر اعلیٰ سمراٹ چودھری نے جرائم پیشہ کو وارننگ دیتے ہوئے کہا تھا کہ میرا کام کچرا صاف کرنا ہے، وہ میں کر رہا ہوں۔ انہوں نے دعویٰ کیا تھا کہ کچھ جرائم پیشہ بہار چھوڑ کر بھاگ رہے ہیں اور جو بچے ہوئے ہیں انہیں 3 ماہ میں بھاگنے پر مجبور کردیں گے۔ ایک طرف جب انہوں نے یہ بیان دیا تو دوسری طرف بدھ کی شام سمستی پور میں بی جے پی لیڈر روپک ساہنی کو گولی مار کر ہلاک کر دیا گیا۔ اس پر آر جے ڈی نے سمراٹ چودھری کو نشانے پر لے لیا۔

روپک ساہنی کو گولی مار کر قتل کئے جانے کے معاملے پرآر جے ڈی لیڈر مرتیونجے تیواری نے جمعرات کو کہا کہ بہار میں نظم ونسق تباہ ہوچکا ہے، عوام بھگوان بھروسے ہیں، یہ حکومت جب بی جے پی لیڈر کی ہی حفاظت نہیں کر پا رہی ہے توعوام کی کیسے کرے گی؟

اس دوران بی جے پی نے آر جے ڈی کے الزامات پرجوابی حملہ کیا ہے۔ پارٹی کے ریاستی ترجمان نیرج کمار نے سمستی پور میں بی جے پی لیڈر روپک ساہنی کے قتل کا ذکر کرتے ہوئے کہا کہ یہ افسوسناک ہے۔ پولیس نے اس معاملے میں دو ملزمین کو گرفتار کیا ہے۔ انہوں نے کہا کہ اپوزیشن اس معاملے پر سیاست نہ کرے، پولیس کی کارروائی میں کہیں کوئی کمی نہیں ہے۔

فی الحال اس واقعے کو لے کر جہاں سیاست شروع ہو گئی ہے، یہ دیکھنا ہوگا کہ سمراٹ چودھری اپنے دعوعے کے مطابق اگلے 3 ماہ میں کس طرح جرائم پر کنٹرول کریں گے۔ واضح رہے کہ سمستی پور میں جس بی جے پی لیڈر روپک ساہنی کا قتل ہوا ہے وہ پنچایت کے چیئرمین تھے۔ پولیس قتل کیس کی تفتیش کر رہی ہے۔ دیکھنا ہوگا کہ معاملہ کب حل ہوتا ہے اور واردات کے ذمہ دار کب سلاخوں کے پیچے ہوتے ہیں؟