سمیر وانکھیڑے نے این سی بی افسر پر عائد کیا استحصال کا الزام، قومی درج فہرست ذات کمیشن سے کی شکایت

گیانیشور سنگھ کی قیادت والی این سی بی وجلنس ٹیم نے حال میں اپنی رپورٹ ڈائریکٹر کو دی، جس میں انھوں نے کہا کہ سمیر وانکھیڑے اور ان کی ٹیم کے افسران سے کروز ڈرگس معاملے میں کئی غلطیاں ہوئی تھیں۔

سمیر وانکھیڈے، تصویر آئی اے این ایس
سمیر وانکھیڈے، تصویر آئی اے این ایس
user

قومی آوازبیورو

ممبئی کے مشہور آرین خان کروز ڈرگس معاملے کی جانچ کو لے کر سرخیوں میں آئے ممبئی این سی بی کے سابق چیف اور آئی آر ایس افسر سمیر وانکھیڑے نے این سی بی افسر گیانیشور سنگھ کے خلاف قومی درج فہرست ذات کمیشن سے شکایت کی ہے۔ سمیر وانکھیڑے نے ان کا استحصال کرنے کا الزام عائد کیا ہے۔

موصولہ اطلاعات کے مطابق سمیر وانکھیڑے نے قومی درج فہرست ذات کمیشن میں حال ہی میں ایک شکایت بھیجی تھی۔ اس میں انھوں نے این سی بی کے ڈی ڈی جی گیانیشور سنگھ پر استحصال کرنے کا الزام عائد کیا ہے۔ سمیر وانکھیڑے نے بتایا کہ جانچ کے دوران انھیں اور ان کے کنبہ کو پریشان کیا گیا۔ سمیر کا کہنا ہے کہ کمیشن نے بتایا کہ 15 دن کے اندر سماعت شروع کی جائے گی۔


بتایا جاتا ہے کہ کمیشن نے معاملے کی جانچ کرنے کا فیصلہ لیا ہے۔ قومی درج فہرست ذات کمیشن نے اپنے حکم میں کہا ہے کہ سمیر وانکھیڑے نے کمیشن کے سربراہ سے بھی ملاقات کی ہے اور اپنے معاملے پر تفصیلی بات چیت کی۔ کمیشن نے وزارت داخلہ، سی بی آئی ٹی سی بورڈ اور این سی بی ڈائریکٹر کو کہا ہے کہ عرضی دہندہ کے ساتھ تفریق اور استحصال ہوا ہے، اس لیے جب تک یہاں معاملہ زیر التوا ہے، اس میں آگے کی کارروائی نہ کی جائے۔

واضح رہے کہ سمیر وانکھیڑے کے خلاف گیانیشور سنگھ کی قیادت والی این سی بی کی وجلنس ٹیم نے حال ہی میں اپنی ایک رپورٹ ڈائریکٹر کو سونپی ہے۔ اس میں انھوں نے یہ بتایا ہے کہ سمیر وانکھیڑے اور ان کی ٹیم کے کچھ افسران نے کروز ڈرگس معاملے میں گرفتار کیے گئے آرین خان ڈرگس کیس میں زبردست بے ضابطگی کی ہے۔ اس معاملے میں مشتبہ افسران کے خلاف محکمہ جاتی جانچ بھی شروع کی گئی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


;