مشہور بیڈمنٹن کھلاڑی سائنا نہوال نے طلاق کا فیصلہ واپس لیا

اولمپک کانسہ کا تمغہ جیتنے والی سائنا نہوال نے 14 جولائی 2025 کو اپنے شوہر پاروپلی کشیپ سے علیحدگی کا فیصلہ کیا تھا لیکن اب اس جوڑے نے اپنا فیصلہ واپس لے لیا ہے۔ بیڈمنٹن کھلاڑی سائنا نہوال اور پاروپلی کشیپ اپنے رشتے کو ایک اور موقع دینا چاہتے ہیں۔ سائنا نہوال نے کل ہفتہ 2 اگست کو اپنے انسٹاگرام پوسٹ کے ذریعہ یہ معلومات شیئر کیں۔

سائنا نہوال نے 19 روز قبل 13 جولائی کی رات ایک انسٹاگرام اسٹوری شیئر کرتے ہوئے اپنے شوہر پاروپلی کشیپ سے علیحدگی کا اعلان کیا۔سائنا نہوال نے اپنی انسٹاگرام اسٹوری پر لکھا کہ زندگی بعض اوقات ہمیں مختلف راستوں پر لے جاتی ہے۔ بیڈمنٹن کھلاڑی نے مزید لکھا کہ میں نے اور پروپلی کشیپ نے کافی سوچ بچار کے بعد علیحدگی کا فیصلہ کیا ہے۔ ہم ایک دوسرے کے لیے امن، ترقی اور بہتر زندگی کا انتخاب کرنا چاہتے ہیں۔ میں اب تک کی تمام یادوں کے لیے خود کو خوش قسمت سمجھتی ہوں اور بدلے میں کچھ نہیں چاہتی۔ سائنا نہوال نے مزید لکھا کہ ہمیں سمجھنے کے لیے آپ کا شکریہ اور ہماری پرائیویسی کا بھی خیال رکھیں۔

سائنا نہوال نے اس پوسٹ کے ٹھیک 19 دن بعد پاروپلی کشیپ کے ساتھ اپنے تعلقات کو ایک اور موقع دیا ہے۔ سائنا نے اس پوسٹ میں اپنے شوہر کے ساتھ ایک تصویر شیئر کی ہے۔ اس تصویر میں وہ پہاڑوں میں گھومتے نظر آ رہے ہیں۔ اس تصویر کے ساتھ سائنا نہوال نے لکھا کہ 'کبھی کبھی دوری آپ کو لوگوں کی اہمیت بتاتی ہے۔ یہاں ہم دونوں ہیں اور ایک بار پھر کوشش کر رہے ہیں۔ سائنا نہوال نے پاروپلی کشیپ کے ساتھ مل کر اس پوسٹ کو شیئر کیا ہے۔