آر ایل ڈی نے اختیار کی بی جے پی سے الگ راہ، مہاراشٹر و جھارکھنڈ اسمبلی انتخاب تنہا لڑنے کا اعلان

مہاراشٹر اور جھارکھنڈ میں اسمبلی انتخاب کی تاریخوں کا اعلان جلد ہی ہونے والا ہے۔ جموں و کشمیر اور ہریانہ اسمبلی انتخابات کے نتائج برآمد ہونے کے بعد اب سبھی کی نظریں مہاراشٹر اور جھارکھنڈ پر ہی مرکوز ہیں۔ اس درمیان بی جے پی کی قیادت والی این ڈی اے میں شگاف دیکھنے کو مل رہا ہے۔ این ڈی اے میں شامل آر ایل ڈی (راشٹریہ لوک دل) نے فیصلہ کیا ہے کہ وہ مہاراشٹر اور جھارکھنڈ دونوں ہی ریاستوں میں تنہا انتخاب لڑے گی۔ ساتھ ہی پارٹی نے یہ بھی واضح کر دیا ہے کہ وہ دونوں ہی ریاستوں کی سبھی اسمبلی سیٹوں پر اپنے امیدوار اتارے گی۔

راشٹریہ لوک دل کے قومی جنرل سکریٹری ترلوک تیاگی کا ایک بیان سامنے آیا ہے جس میں انھوں نے آر ایس ایس کے قلعہ تصور کیے جانے والے ناگپور سے بھی آر ایل ڈی امیدوار کو کھڑا کرنے کا عزم ظاہر کیا ہے۔ انھوں نے کہا کہ مہاراشٹر کے ناگپور میں چودھری چرن سنگھ کو پسند کرنے والوں کی بڑی جماعت تھی۔ ناگپور میں ہزاروں بیل گاڑیوں سے ان کا استقبال ہوا تھا۔ ساتھ ہی انھوں نے بتایا کہ ناگپور میں کرمی سماج کے لوگ بڑی تعداد میں رہتے ہیں۔ وہ سبھی چودھری چرن سنگھ کے مرید ہیں۔

ترلوک تیاگی کا کہنا ہے کہ آر ایل ڈی 14 اکتوبر کو ناگپور میں ایک انتہائی اہم میٹنگ کرنے جا رہی ہے۔ اس کے بعد جھارکھنڈ اسمبلی انتخاب کے پیش نظر رانچی میں بھی ایک میٹنگ منعقد ہوگی۔ این ڈی اے سے الگ ہو کر انتخاب لڑنے کے بارے میں جب ان سے سوال کیا گیا تو انھوں نے کہا کہ فائدہ یا نقصان کی بات نہیں ہے، کوشش آر ایل ڈی کو آگے بڑھانے کی ہے۔ ترلوک نے یہ بھی کہا کہ اگر بی جے پی کو نقصان ہوتا ہے تو ہمیں اتحاد میں لے لیں، ہم ساتھ لڑنے کے لیے تیار ہیں۔ اس بیان سے اندازہ ہوتا ہے کہ بی جے پی نے خود ہی آر ایل ڈی سے الگ راہ اختیار کرنے کا فیصلہ کیا ہے۔