تصویری جھلکیاں: یوم جمہوریہ پر مدارس اسلامیہ میں نظر آیا حب الوطنی کا جذبہ

مظفر نگر / سہارنپور: ہندوستان کا 70واں یوم جمہوریہ جوش و خروش کے ساتھ منایا گیا۔ اس موقع پر مدارس اسلامیہ بھی حب الوطنی کے رنگوں میں شرابور رہے۔ تمام مدراس میں پرچم کشائی کی گئی اور طالب علموں نے حب الوطنی پر مبنی ترانے اور نظمیں پیش کیں۔ اس موقع پر ہندوستان کی جنگ آزادی اور اس کی اہمیت پر اساتذہ اور مہمانان خصوصی کی طرف سے روشنی ڈالی گئی۔

واضح رہے کہ ہندو انتہا پسندوں کی طرف سے اکثر مدارس اسلامیہ پر یہ الزام عائد کیا جاتا ہے کہ مدرسوں میں یوم آزادی اور یوم جمہوریہ کے موقع پر پرچم کشائی نہیں کی جاتی، یہ مختلف تصاویر مدارس کو غلط نظر سے دیکھنے والوں کے منہ پر طمانچے کے مانند ہیں۔

یہ سبھی تصاویر مغربی اتر پردیش کی ہیں اس میں دارالعلوم دیوبند کی بھی تصاویر شامل ہیں۔ دیوبند میں واقع دارالعلوم میں مولانا ارشد مدنی نے پرچم کشائی کی اور وطن کے نام محبت اور ہم آہنگی کا پیغام دیا۔

دیکھئے کچھ تصاویر:

دیوبند میں مولانا ارشد مدنی نے پرچم کشائی کی۔

میرٹھ-بجنور روڈ پر میرانپور میں واقع مدرسہ جامعہ اسلامیہ میں مقامی پولس اسٹیشن کے افسران نے بھی شرکت کی اور مدرسہ کے طلبا کی ستائش کی۔

اس موقع پر قومہ ترانہ گایا گیا اور ترنگے پرچم کو سلامی دی گئی۔

71 سالہ محمد عباس بھی یوم جمہوریہ کے رنگ میں شرابور نظر آئے۔ انہوں نے قومی پرچم کے رنگوں والی پگڑی پہنی ہوئی تھی۔ محمد عباس نے اس موقع پر کہا کہ وطن پرستی ہمارے ایمان میں شامل ہے۔

یوم جمہوریہ کا جوش و خروش کم طلبا والے مدرسوں میں نظر آیا۔

مدرسوں میں بچے الصبح پہنچ گئے تھے۔ سارے بچوں کے ہاتھوں میں قومی پرچم تھے۔ صاف ستھرے کپڑے پہنے ہوئے تھے اور حب الوطنی کے نعرے لگا رہے تھے۔ اس موقع پر طالبات بھی پیش پیش رہیں، پیش ہے میرانپور کیتھوڑہ علاقہ کی ایک تصویر۔

دیوبند سے ملحقہ مدارس میں اسکاؤٹ ٹرینگ پر بھی خصوصی توجہ دی جا رہی ہے۔ اسکاؤٹ ڈریس میں ایک طالب علم تقریر کرتا ہوا۔

اس موقع پر مدارس کے بچوں میں جوش و خروش نظر آیا۔ ان سبھی نے ہاتھوں میں ’بھارت پیارا ہے‘ اور ’جے ہند‘ جیسے نعروں کی تختیاں تھامے ہوئے تھے۔

میدان پر ترنگا پرچم لے کر کھیلتا ایک بچہ۔