یوپی کے 14 اضلاع میں شدید بارش، آندھی اور آسمانی بجلی کا ریڈ الرٹ، کئی ریاستوں کے لیے بھی انتباہ جاری

ہندوستانی محکمہ موسمیات نے جمعرات کی شام اتر پردیش سمیت ملک کی متعدد ریاستوں میں خراب موسم کے پیش نظر فوری موسمی انتباہ جاری کرتے ہوئے عوام کو محتاط رہنے کی ہدایت دی ہے۔ محکمہ کے مطابق آئندہ دو سے تین گھنٹوں کے دوران کئی علاقوں میں شدید بارش، آندھی، تیز ہوائیں اور آسمانی بجلی گرنے کا امکان ہے۔

محکمہ موسمیات نے اتر پردیش کے 14 اضلاع کے لیے ریڈ الرٹ جاری کیا ہے۔ ان اضلاع میں امبیڈکر نگر، اعظم گڑھ، بہرائچ، باندا، چترکوٹ، ہردوئی، کنوج، کانپور دیہات، کانپور نگر، لکھیم پور کھیری، لکھنؤ، شراوستی، سیتاپور اور اناؤ شامل ہیں۔ محکمہ کے مطابق ان علاقوں میں تیز گرج چمک کے ساتھ آسمانی بجلی گرنے، تقریباً 60 کلومیٹر فی گھنٹہ کی رفتار سے تیز ہوائیں چلنے اور فی گھنٹہ 15 ملی میٹر سے زائد بارش ہونے کا امکان ہے۔

اس کے علاوہ اتر پردیش کے متعدد دیگر اضلاع کے لیے بھی موسمی انتباہ جاری کیا گیا ہے۔ ان میں امیٹھی، اوریا، ایودھیا، بدایوں، بلیا، بلرام پور، بارہ بنکی، بریلی، بستی، فرخ آباد، فتح پور، غازی پور، گونڈا، گورکھ پور، ہمیر پور، مئو، رائے بریلی، رام پور، سنبھل، سنت کبیر نگر اور شاہجہاں پور شامل ہیں۔ ان اضلاع میں گرج چمک کے ساتھ بارش، آسمانی بجلی گرنے اور 40 سے 60 کلومیٹر فی گھنٹہ کی رفتار سے تیز ہوائیں چلنے کا امکان ظاہر کیا گیا ہے۔

محکمہ موسمیات نے اتر پردیش کے علاوہ چھتیس گڑھ، مدھیہ پردیش، بہار، گجرات، مغربی بنگال، اڈیشہ اور پنجاب کے کئی اضلاع کے لیے بھی اورنج الرٹ جاری کیا ہے۔ چھتیس گڑھ کے متعدد اضلاع میں درمیانی درجے کی بارش اور تیز ہواؤں کی پیش گوئی کی گئی ہے، جبکہ مدھیہ پردیش کے انوپ پور، دموہ، ڈنڈوری، جبل پور، منڈلا، ریوا، ساگر، شہڈول، سیدھی، سنگرولی اور ودیشا اضلاع بھی موسمی انتباہ کی زد میں ہیں۔

اسی طرح بہار کے پوربی چمپارن، گوپال گنج، مظفر پور، شیوہر اور سیتامڑھی، گجرات کے کچھ، موربی، راجکوٹ اور سریندر نگر، مغربی بنگال کے جھارگرام اور پشچم مدنی پور، اڈیشہ کے سندر گڑھ اور پنجاب کے ترن تارن میں بھی خراب موسم کی پیش گوئی کی گئی ہے۔ ان علاقوں میں 40 سے 60 کلومیٹر فی گھنٹہ کی رفتار سے تیز ہوائیں چلنے اور درمیانی شدت کی بارش ہونے کا امکان ظاہر کیا گیا ہے۔

محکمہ موسمیات نے عوام سے اپیل کی ہے کہ خراب موسم کے دوران غیر ضروری سفر سے گریز کریں، کمزور یا درختوں کے نیچے پناہ لینے سے بچیں اور مقامی انتظامیہ کی جانب سے جاری ہدایات پر عمل کریں تاکہ کسی بھی ناخوشگوار واقعے سے محفوظ رہا جا سکے۔